Oralda 10 jasar oqýshy qyzdy qaǵyp óltirgen júrgizýshige sot úkimi shyqty, dep habarlaidy "Ult aqparat".
Oral qalalyq soty Valerii Petrýnindi QR QK 345-baby (kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy) jáne 347-babyna (jol-kólik oqiǵasy bolǵan jerden ketip qalý) sáikes aiypty dep tanydy.
Ol 2,5 jylǵa bas bostandyǵynan aiyrý jazasyn qaýipsizdigi tómen qylmystyq-atqarý júiesi mekemesinde óteýge sottaldy. Sonymen qatar V.Petrýnin 5 jylǵa kólik quralyn júrgizý quqyǵynan aiyryldy.
Oǵan qosa sýdia Maǵira Qitarova Oral qalasy ákimi atyna jeke qaýly shyǵardy.
Sot úkimi kúshine engen joq.
Qaitys bolǵan qyzdyń ákesi Asylhan Qaziev sottalýshynyń eki kishkentai balasy bolǵandyqtan, keshirgendigin jetkizdi.
Budan buryn jazǵanymyzdai, atalǵan júrgizýshi ótken jyly 20 qarasha kúni keshkisin jaiaý júrginshi ótkelinen ótip bara jatqan 10 jasar qyzdy qaǵyp, oqiǵa ornynan boi tasalaǵan bolatyn.
Keiin ol ustalyp, eki aiǵa qamaýǵa alyndy.
Osy oqiǵaǵa bailanysty máiithanada qyzdyń súiegin shatastyryp, basqa bireýge berip jibergender jaýapqa tartylyp, Oral qalasy ákimine sógis jariialandy.
