Seisenbi kúni Oral qalalyq ákimdigindegi qoǵamdyq tyńdaý kezinde turǵyndar qala ortalyǵyn jańa aýdanmen jalǵaidy dep josparlanǵan kópir ekologiiaǵa nuqsan keltiretinin aitty. Kei turǵyndar kópirdi basqa jaqqa salýdy usynsa, keibiri jobadan múlde bas tartýdy talap etti. Ákimdik ókilderi olardyń usynystaryn eskerýge ýáde berdi.
Shaǵan ózenine salynatyn jańa kópir qala ortalyǵyn "Aqjaiyq" yqsham aýdanyna jalǵaýy tiis. Joba boiynsha, kópir salatyn jerdegi 1500 túp aǵash kesilip, tóńiregindegi tórt turǵyn úi buzylady.
- Jol saiabaqty kesip ósedi. Bul - qalaǵa tynys berip turǵan qalyń aǵashy bar saiabaq. Saiabaq joiylsa qala ekologiiasyna tikelei áser etedi. Ekologiiaǵa áseri jaily esep-qisaptaryńyz bar ma?- dedi turǵyndardyń biri Bolat Jurmuhambetov.
Qala ákiminiń orynbasary Bekjan Toqjanov mundai esep júrgizilmegendikten suraqqa jaýap bere almaitynyn aitty.
- Bul ázirge joba men qoǵamdyq tyńdaý ǵana. Naqty qurylys jaily áńgime ázirge qozǵalǵan joq, - dedi Toqjanov. Biraq onyń sózine qaraǵanda bolashaq kópir jobasy bekitilip qoiǵan.
Jergilikti kásipker Mihail Marchenko jańa kópir balyq sharýashylyǵyna keri áser etedi dep sanaidy. Ol jańadan salynatyn kópir mańyndaǵy shaǵyn kólderde on jyldan beri balyqshylyqpen ainalysady.
- Qurylys bastalmai jatyp, balyqqa ziiany tiip jatyr: kóp tehnika, qurylys jumystary, qoqystar, qaldyqtar - osynyń bári sýdyń sapasyna áser etedi, - dedi Marchenko.
Al Bekjan Toqjanov kópir qurylysy balyq sharýashylyǵyna áser etpeidi dep sendirýge tyrysty.
Turǵyndar men bilik arasyndaǵy dialog birneshe saǵatqa sozylsa da, jinalǵandar ortaq sheshimge kele almady. Kezdesý sońynda turǵyndar máseleni daýys berý arqyly sheshýdi usynǵan, biraq qala ákiminiń orynbasary Bekjan Toqjanov kelispedi. Ol jýrnalister suraqtaryna jaýap bermei ketti.
Ákimdik jospary boiynsha, Shaǵan ózenine salynatyn kópir 2020 jyly bastalyp, 2022 jyly aiaqtalýy tiis. Qurylysqa shamamen 8-13 milliard teńge jumsalady.
