Oral qalasynda tok soqqan eki er adam jansaqtaý bólimine tústi, dep habarlaidy QazAqparat.
Zachagan kentiniń ákimi Aqqali Áýbekerovtiń aitýynsha, oqiǵa 28 maýsym kúni Móńkeuly kóshesi boiynda boldy.
«27 maýsym kúni keshke qarai osy aýdanda elektr jaryǵy óship qalǵan bolatyn. Onshaqty kópqabatty úide, №6 emhanada, jekpe-jek sport mektebinde, sorǵy stansasynda jaryq bolmady. Keshe «Batys Qazaqstan elektr jelilik kompaniiasy» JShS qyzmetkerleri kelip, qalpyna keltirý jumystaryn júrgizdi. Jer astyndaǵy úzilgen kabeldi jalǵaý kezinde eki adamdy tok soǵyp, olardy sol boida jedel járdem brigadasy alyp ketti», - dedi Áýbekerov.
BQO densaýlyq saqtaý basqarmasy baspasóz qyzmetiniń naqtylaýynsha, jedel járdemge shaqyrtý saǵat 16.52-de túsken.
«Oqys oqiǵa saldarynan 1989 jylǵy er adamnyń beti, eki qoly, eki aiaǵy kúigen. 2-3 dárejeli 15-16 paiyz kúiik jaraqatyn alǵan. Bastapqyda jansaqtaý bólimine túskenimen, keiin palataǵa aýystyryldy. Jaǵdaiy turaqty. 1979 jylǵy er adamnyń beti, eki qoly men aiaǵy, denesin 55 paiyz (3-dárejeli) kúiik shalǵan. Jaǵdaiy aýyr, jansaqtaý bóliminde», dep habarlady vedomstvodan.
BQO boiynsha eńbek inspektsiiasy basqarmasynyń basshysy Asylulan Dosjanov mekemege material túskennen keiin komissiia qurylyp, tekseriletinin jetkizdi.
