Kórneki sýret
Oral qalasy ákimdigi Oralda sheneýnikter páterlerdi zańsyz berdi degen aqparatqa qatysty pikir bildirdi. Sybailas jemqorlyqqa qarsy kúres departamenti málimetinshe, kezekte turǵan 189 adam tizimnen shyǵyp qalǵan, - dep habarlaidy Tengrinews.kz agenttigi "Moi GOROD" portalyna silteme jasap.
Qala ákimdigi ókilderi óz tarapynan eshqandai qatelik bolmaǵanyn málimdegen. Turǵyn úi kommýnaldyq sharýashylyǵy, jolaýshy kóligi jáne avtomobil joldary bólimi basshysynyń orynbasary Qanat Ómiráliev úi kezeginde turǵandar zań boiynsha esepten shyǵarylatyn jaǵdailar bar ekenin atap ótti.
"Zańǵa sáikes, baspana kezeginde turǵandardyń jeke baspanasy bolsa nemese olar basqa qalaǵa kóship ketse nemese memlekettik qyzmetten shyǵyp ketse, olardy kezekten alyp tastaimyz, bul - zańdy. Kópbalaly otbasylar, múgedek bala tárbielep otyrǵan otbasylar jáne tolyq emes otbasylar esepten shyǵarýǵa jatpaidy. Kópbalaly otbasynda tárbielengen balalar kámeletke tolǵan bolsa, olardy da esepten shyǵara almaimyz. Biraq olardyń baspanasy bolsa nemese kóship ketken bolsa, biz kezekten shyǵara alamyz. Bizde mundai 55 jaǵdai bar", - deidi Qanat Ómiráliev.
Zańsyz baspana alǵan 247 adamǵa kelsek, Qanat Ómiráliev bul azamattar turǵyn úi qorynan sharshy metr alǵanyn túsindirdi. Páterler rotatsiia boiynsha basqa oblystan qalamyzǵa kelgen meditsina qyzmetkerlerine, áskeri qyzmetkerlerge, quqyq qorǵaý organdary qyzmetkerlerine, biýdjettik uiymdardyń qyzmetkerlerine berilgen.
Oral qalasy ákiminiń orynbasary Miras Múlkái biyl mamyrdaǵy málimetke sai 13 sanat boiynsha baspana kezeginde 22 myńnan astam adam turǵanyn qosty. Negizinen, bul kópbalaly otbasylar, Ekinshi dúniejúzilik soǵys ardagerleri, jetim balalar, tolyq emes otbasylar.
"Bul sanattar ishinde kezekte turǵandar da bar, biraq olardyń jeke baspanasy bar. Biz olardy kezekten shyǵara almaimyz, biraq kezekte turǵan adamnyń eki páteri nemese jalpy aýdany 280 sharshy metr jekemenshik úii bolǵan jaǵdailar boldy. Zań boiynsha olarǵa baspana bermeýge quqyǵymyz bar, biraq kezekten shyǵarýǵa quqymyz joq", - dedi Múlkái.
Sondai-aq, BQO ákimi Ǵali Esqaliev te Facebook-paraqshasynda oqiǵaǵa qatysty pikir bildirip, jaǵdaidy jeke baqylaýyna alǵanyn jazǵan.
"Oral qalasy ákimdigine jan-jaqty aqparat berýdi tapsyrdym. Eger maqalada kórsetilgen derekter rastala, jaýapty laýazymdy tulǵalar zań aiasynda jaýapkershilikke tartylady. Bul máseleni jeke baqylaýymda ustaimyn", - dep jazdy ákim.
Eske salaiyq, buǵan deiin Oralda sheneýnikter páterlerdi zańsyz berip, kezekte turǵandardy baspanadan aiyrǵany habarlanǵan bolatyn. Muny Antikor anyqtaǵan. Sybailas jemqorlyqqa qarsy kúres departamentiniń málimetinshe, kezekte turǵan 189 adam tizimnen shyǵyp qalǵan.
