كٶرنەكٸ سۋرەت
ورال قالاسى ەكٸمدٸگٸ ورالدا شەنەۋنٸكتەر پەتەرلەردٸ زاڭسىز بەردٸ دەگەن اقپاراتقا قاتىستى پٸكٸر بٸلدٸردٸ. سىبايلاس جەمقورلىققا قارسى كٷرەس دەپارتامەنتٸ مەلٸمەتٸنشە, كەزەكتە تۇرعان 189 ادام تٸزٸمنەن شىعىپ قالعان, - دەپ حابارلايدى Tengrinews.kz اگەنتتٸگٸ "موي گورود" پورتالىنا سٸلتەمە جاساپ.
قالا ەكٸمدٸگٸ ٶكٸلدەرٸ ٶز تاراپىنان ەشقانداي قاتەلٸك بولماعانىن مەلٸمدەگەن. تۇرعىن ٷي كوممۋنالدىق شارۋاشىلىعى, جولاۋشى كٶلٸگٸ جەنە اۆتوموبيل جولدارى بٶلٸمٸ باسشىسىنىڭ ورىنباسارى قانات ٶمٸرەليەۆ ٷي كەزەگٸندە تۇرعاندار زاڭ بويىنشا ەسەپتەن شىعارىلاتىن جاعدايلار بار ەكەنٸن اتاپ ٶتتٸ.
"زاڭعا سەيكەس, باسپانا كەزەگٸندە تۇرعانداردىڭ جەكە باسپاناسى بولسا نەمەسە ولار باسقا قالاعا كٶشٸپ كەتسە نەمەسە مەملەكەتتٸك قىزمەتتەن شىعىپ كەتسە, ولاردى كەزەكتەن الىپ تاستايمىز, بۇل - زاڭدى. كٶپبالالى وتباسىلار, مٷگەدەك بالا تەربيەلەپ وتىرعان وتباسىلار جەنە تولىق ەمەس وتباسىلار ەسەپتەن شىعارۋعا جاتپايدى. كٶپبالالى وتباسىندا تەربيەلەنگەن بالالار كەمەلەتكە تولعان بولسا, ولاردى دا ەسەپتەن شىعارا المايمىز. بٸراق ولاردىڭ باسپاناسى بولسا نەمەسە كٶشٸپ كەتكەن بولسا, بٸز كەزەكتەن شىعارا الامىز. بٸزدە مۇنداي 55 جاعداي بار", - دەيدٸ قانات ٶمٸرەليەۆ.
زاڭسىز باسپانا العان 247 ادامعا كەلسەك, قانات ٶمٸرەليەۆ بۇل ازاماتتار تۇرعىن ٷي قورىنان شارشى مەتر العانىن تٷسٸندٸردٸ. پەتەرلەر روتاتسييا بويىنشا باسقا وبلىستان قالامىزعا كەلگەن مەديتسينا قىزمەتكەرلەرٸنە, ەسكەري قىزمەتكەرلەرگە, قۇقىق قورعاۋ ورگاندارى قىزمەتكەرلەرٸنە, بيۋدجەتتٸك ۇيىمداردىڭ قىزمەتكەرلەرٸنە بەرٸلگەن.
ورال قالاسى ەكٸمٸنٸڭ ورىنباسارى ميراس مٷلكەي بيىل مامىرداعى مەلٸمەتكە ساي 13 سانات بويىنشا باسپانا كەزەگٸندە 22 مىڭنان استام ادام تۇرعانىن قوستى. نەگٸزٸنەن, بۇل كٶپبالالى وتباسىلار, ەكٸنشٸ دٷنيەجٷزٸلٸك سوعىس ارداگەرلەرٸ, جەتٸم بالالار, تولىق ەمەس وتباسىلار.
"بۇل ساناتتار ٸشٸندە كەزەكتە تۇرعاندار دا بار, بٸراق ولاردىڭ جەكە باسپاناسى بار. بٸز ولاردى كەزەكتەن شىعارا المايمىز, بٸراق كەزەكتە تۇرعان ادامنىڭ ەكٸ پەتەرٸ نەمەسە جالپى اۋدانى 280 شارشى مەتر جەكەمەنشٸك ٷيٸ بولعان جاعدايلار بولدى. زاڭ بويىنشا ولارعا باسپانا بەرمەۋگە قۇقىعىمىز بار, بٸراق كەزەكتەن شىعارۋعا قۇقىمىز جوق", - دەدٸ مٷلكەي.
سونداي-اق, بقو ەكٸمٸ عالي ەسقاليەۆ تە Facebook-پاراقشاسىندا وقيعاعا قاتىستى پٸكٸر بٸلدٸرٸپ, جاعدايدى جەكە باقىلاۋىنا العانىن جازعان.
"ورال قالاسى ەكٸمدٸگٸنە جان-جاقتى اقپارات بەرۋدٸ تاپسىردىم. ەگەر ماقالادا كٶرسەتٸلگەن دەرەكتەر راستالا, جاۋاپتى لاۋازىمدى تۇلعالار زاڭ اياسىندا جاۋاپكەرشٸلٸككە تارتىلادى. بۇل مەسەلەنٸ جەكە باقىلاۋىمدا ۇستايمىن", - دەپ جازدى ەكٸم.
ەسكە سالايىق, بۇعان دەيٸن ورالدا شەنەۋنٸكتەر پەتەرلەردٸ زاڭسىز بەرٸپ, كەزەكتە تۇرعانداردى باسپانادان ايىرعانى حابارلانعان بولاتىن. مۇنى انتيكور انىقتاعان. سىبايلاس جەمقورلىققا قارسى كٷرەس دەپارتامەنتٸنٸڭ مەلٸمەتٸنشە, كەزەكتە تۇرعان 189 ادام تٸزٸمنەن شىعىپ قالعان.
