© Photo: BQO TJD
Oraldyń tergeý soty mekemedegi jarylys isi boiynsha basty kúdikti retinde tanylǵan "Rizyq" dámhanasynyń jalǵa alýshysy 34 jastaǵy Meńdibek Ýálievti qamaýǵa alýǵa sanktsiia berdi, dep habarlaidy Sputnik Qazaqstan saity "Moi gorod" portalyna silteme jasap.
Memlekettik aiyptaýshy halyqtyń sanitarlyq-epidemiologiialyq salaýattylyǵy salasyndaǵy zańnama talaptaryn buzǵany úshin Ýálievtiń buǵan deiin de birneshe ret ákimshilik jaýapqa tartylǵanyn aitty. Sondai-aq oǵan zańnamany buza otyryp, sheteldik jumys kúshi men eńbek migranttaryn tartqany úshin hattama toltyryldy.
Ýálievtiń ózi sottan ony bas bostandyǵynan aiyrmaýdy, úiqamaqqa jiberýdi surady. Onyń aitýynsha, saraptamalar áli aiaqtalmaǵan, qaiǵyly oqiǵanyń naqty sebepteri ázirge belgisiz.
Kúdiktiniń advokaty Tamara Sársenova da órttiń shyǵý sebebi ázirge belgisiz ekenin atap ótti. Onyń aitýynsha, jaýap alynǵan kýágerler birinshi qabatta tabiǵi gazdy paidalanǵanyn, ekinshi qabatta adamdar turatynyn jáne jalǵa berilgen ǵimaratta pesh bolǵanyn aitqan. Peshtiń qaida qosylǵany ázirge belgisiz.
"Osyǵan qaramastan, mamandandyrylǵan tergeý sotynyń sýdiasy Saian Júnisbaev Ýálievti 2024 jyldyń 6 naýryzyna deiin qamaýda ustaýǵa sanktsiia berdi. Sot sheshimi zańdy kúshine engen joq jáne ol jariialanǵan kúnnen bastap úsh kún ishinde shaǵymdanýǵa bolady", - delingen habarlamada.
Eske sala keteiik, Oralda 4 qańtarda túngi saǵat 2-de dámhana ǵimaratynda gaz-aýa qospasy jarylǵan. Keiinnen órt bolǵan. Saldarynan úsh adam qaza taýyp, altaýy zardap shekken.
