Foto: gov.kz
Batys Qazaqstan oblysynyń ákimi Nariman Tóreǵaliev Mánshúk Mámetova atyndaǵy Oral halyqaralyq áýejaiynda kimderdiń úlesi bar ekenin aitty, dep habarlaidy QazAqparat agenttigi.
Ortalyq kommýnikatsiialar qyzmetindegi baspasóz máslihatynda BAQ ókilderi ákimnen: «Buǵan deiin Batys Qazaqstan oblysynda Mánshúk Mámetova atyndaǵy halyqaralyq áýejaidy reseilik oligarhtyń senimgerlik basqarýǵa alǵany úlken daý bolǵan. Endi muz aidyny, at sporty mekemesi, «Aq Jaiyq» fýtbol klýbynyń stadiony siiaqty nysandar osyndai jolmen jeke qolǵa ótipti. Osynyń saldarynan qazir sportshylar ózderine yńǵaily ýaqytta jattyǵa almai júr eken. Memleket qarjylandyratyn bul nysandardy senimgerlik basqarýǵa alǵan kimder? Reseilikter me? Ne sebepti bul máseleni oblys ákimdigi sheshe almai otyr?» - dep suraǵan edi.
Oblys basshysynyń málimetinshe, Oral áýejaiy eskirgen. Jalpy, áýejai 2009 jyldan beri jeke kompaniianyń senimgerlik basqarýynda bolǵan.
«Áýejai terminaly búgingi kúnniń talaptaryna sáikes kelmedi. Soǵan bailanysty ushyp-qonýǵa nemese keibir áýe reisterin ashýǵa múmkindik bolmady. Eń qiyny, jolaýshylar jertólege túsip baryp ushaqqa otyratyn edi. Tómen túsýge múgedek jandardyń, balaly analardyń esh múmkindigi bolmady», - dedi óńir basshysy.
Onyń atap ótýinshe, áýejaiǵa 6,6 mlrd teńgege jóndeý jumystary júrgizilgen. Alańy 10 myń sharshy metrge ulǵaitylǵan.
«Nege Resei kompaniiasy? Jalpy, ózderińiz biletin bolarsyzdar, bul áýejaidyń jyry birazdan bere kele jatyr. Búginde reseilik «Retrans» kompaniiasynyń áýejaida 49 paiyz úlesi bar. 49 paiyzy Qazaqstan azamaty Dáýlethan Qilybaevqa tiesili. Qalǵan 2 paiyzy da Qazaqstan azamatynda, iaǵni, 51 paiyzy bizde. Ol – basqarýshy kompaniia. Demek, áýejaidyń ushyp-qoný jolaǵy, terminaly memleket menshiginde. Olardyń menshiginde tek qana ushaq ushyp kelgende burylatyn shaǵyn ýchaske men turaq bar. Qalǵan barlyq strategiialyq nysan memleket menshiginde», - dedi Nariman Tóreǵaliev.
Onyń atap ótýinshe, muz aidyny, stadion syndy nysandar básekelestik ortada bolýy tiis.
«Búginde muz aidyny qatelespesem Rýbtsov degen azamatta. Sol azamatqa 2021 ne 2022 jyly senimgerlik basqarýǵa berildi. Qazir jumys istep jatyr. Biz senimgerlik basqarýǵa alǵan kompaniialardyń aldyna naqty tapsyrmalar qoiyp otyrmyz. Olar jumys isteimiz dep aldy... Olar kelisimge sáikes talaptardy oryndaýy kerek. Eger kelisimshartta kórsetilgen talaptar oryndalmasa, halyqqa sapaly qyzmet kórsetpese, onda memleket nysandy qaitaryp alýǵa quqyly, iaǵni memlekettiń ondai qyzmeti kózdelgen. Nysandar jekege ótip ketken joq. Ýaqytsha senimgerlik basqarýǵa berildi», - dedi oblys basshysy.
