Ońtústik Qazaqstan oblysynda Qazaqstan halqynyń tilderi kúnine arnalǵan «Memlekettik til – Máńgilik eldiń máńgilik tili» atty merekelik shara ótti. Is-shara aiasynda oblystyq etnomádeni birlestikterdiń ulttyq taǵamdary men qolóner buiymdarynyń jáne oblys aýmaǵynda áreket etetin tilderdi oqytý ortalyqtarynyń kórmesi uiymdastyryldy, dep habarlaidy "Ult aqparat" aimaq basshysynyń baspasóz qyzmetine siltem jasap.
«Tilder týraly» QR Zańynyń qabyldanǵanyna 20 jyl tolýyna orai biyl óńirdegi etnomádeni birlestikter tili men mádenieti jáne salt-dástúri kúnin berekeli assambleia shańyraǵynyń astynda birlese ótkizýdi uiǵardy. Muny – dostyq pen tatýlyqty tý etken ońtústikqazaqstandyq etnos ókilderiniń baiypty bastamasy, saliqaly sheshimi deýge bolady.
Saltanatty jiynǵa qatysqan oblys ákimi Janseiit Túimebaev óńir turǵyndaryn merekemen quttyqtap, elimizde memlekettik til saiasatynyń júzege asýyna laiyqty úles qosyp júrgen birqatar azamattardy marapattady. Óz quttyqtaý sózinde aimaq basshysy ishki turaqtylyq pen qoǵamdyq kelisimdi saqtaýda syndarly til saiasaty úlken mańyzǵa ie ekenin aitty.
«Til – kez kelgen ulttyń bolmys-bitimin daralaityn asyl qazynasy jáne ulttyq ereksheligin kórsetetin eń mańyzdy qundylyq. Qazaqstanda turatyn etnostardyń tilderine qurmet kórsetý, olardyń ana tili men tól mádenietin damytýyna jaǵdai jasaý – memleketimizdiń mańyzdy strategiialyq mindetteriniń biri. Respýblika boiynsha halyq sany jaǵynan da, túrli etnostyń basym shoǵyrlanýymen de birinshi turatyn jáne tili men salt-dástúrdiń saqtalýymen erekshelenetin ólkeniń biri de osy – Ońtústik»,-dedi ákim.
Búgingi sharaǵa qatysýshylar da Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasyndaǵy ulttyq birgeilikti saqtaý, úsh tilde bilim berý, ulttyq qod jáne qazaq tilin latyn grafikasyna kóshirý syndy baiypty bastamalaryn qoldap, etnostardyń tili men tól mádenietin saqtai otyryp, barsha qazaqstandyqtardy biriktirýshi memlekettik tildiń alar orny erek ekenin atap ótti.
Saltanatty sharada qazaqstandyqtardyń berekeli birligin dáripteitin «Yntymaq» poetikalyq kompozitsiiasy sahnalanyp, etnomádeni birlestikterdiń janyndaǵy shyǵarmashylyq ujymdar daiyndaǵan kontserttik baǵdarlama men qazaq tiliniń qarpin latyn grafikasyna kóshirý týraly horeografiialyq kompozitsiiasy kópshiliktiń nazaryna usynyldy.
Aita keteiik, óńirde júrgizilgen taldaý jumystarynyń nátijesinde memlekettik tildi erkin meńgergen turǵyndar úlesi – 92,1 paiyz bolsa, orys tilin uǵatyndar – 63 paiyzǵa, al, aǵylshyn tilin biletinder – 14 paiyzǵa jetken. Sondai-aq, óńirdegi etnos ókilderiniń 70 paiyzy memlekettik tildi erkin meńgergen.
