Túrkistan oblysy Saryaǵash aýdanynda politseiler áleýmettik jeli arqyly jalǵan aqparat taratyp, jurtty dúrliktirgen áieldi anyqtady. Ol WhatsApp jelisi arqyly «Saryaǵashta virýs shashady» dep jalǵan aqparat taratqan, dep habarlaidy "Ult aqparat".
Oblystyq PD baspasóz qyzmetiniń málimetinshe, keshe áleýmettik jelide «Túngi 2-3 arasynda Saryaǵashta balalardy aýyrtatyn virýs sebiledi eken, balalardy kóshege shyǵarmasyn dep jatyr» degen habarlama taraǵan. Bul jalǵan aqparatty taratqan áieldi anyqtaý maqsatynda jedel-izdestirý sharalary júrgizilip, nátijesinde onyń kim ekeni anyqtaldy. Ol Saryaǵash qalasynyń turǵyny bolyp shyqty.
Tekserý barysynda anyqtalǵandai, áiel bul habarlamany tek týystary kóshege shyqpai, úide otyrýy úshin jazǵan. Ony tek kelinine WhatsApp jelisi arqyly joldaǵanyn jetkizgen.
«Atalǵan jait QR QK-niń 274-babymen tirkeldi. Osy oraida politseiler Túrkistan oblysynyń turǵyndaryn osyndai jalǵan aqparattarǵa senbeýge shaqyrady. Sondai-aq, dálel-dáieksiz, el ishin dúrliktiretin aqparat taratqandar QR Qylmystyq kodeksiniń 274-baby boiynsha jaýapqa tartylatynyn da eskertedi» delingen habarlamada.
