Biyl Ońtústik Qazaqstan oblysynyń baǵbandary 86,4 myń tonna alma jinady, dep habarlaidy "Ult aqparat" oblys ákiminiń baspasóz qyzmetine silteme jasap.
Biyl óńirde 654,8 gektarǵa qarqyndy alma baýy otyrǵyzylsa, qarqyndy baýdyń jalpy kólemi 2 800 gektarǵa jetip otyr.
Alma ósirý - Ońtústikte aýyl sharýashylyǵynyń basymdy baǵyttarynyń biri. Óńirdiń tabiǵaty qolaily bolǵandyqtan alma oblystyń kez kelgen aýdanynda ósedi. Degenmen bul sharýashylyqpen ainalysýdy Túlkibas, Qazyǵurt, Tólebi, Saryǵash, Ordabasy jáne Báidibek aýdanynyń sharýalary myqtap qolǵa alǵan.
Jalpy aimaqta alma ósirýmen ainalysatyn 100-ge jýyq sharýa qojalyqtary bar. Sonyń ishinde «Amangeldi» JShS eń irisi sanalady. Atalǵan seriktestik ieliginde búginde 530 gektar alma baýy bar. Al, «Arsenal sad» JShS 304 gektar jerde óz baýyn jaiqaltyp otyr.
Ońtústik Qazaqstanda ósirilgen alma jemisi negizinen Qazaqstannyń ózge oblystarymen qatar Resei men Ózbekstanǵa eksporttalady.
Qalypty alma baýdyń ár gektarynan 20-30 tonna ónim alynsa, qarqyndy baýdan 40-50 tonnaǵa deiin ónim jinaýǵa bolady. Sondyqtan memleket qarqyndy baýmen ainalysamyn degenderge qoldaý kórsetýde.
Máselen, qarqyndy baýdyń ár gektaryna sapasyna qarai 1 mln-nan 2,8 mln teńgege deiin sýbsidiia beriledi. Sondai-aq, otyrǵyzylǵan jemistiń árbir kóshetine 135 teńge sýbsidiia qarastyrylady. Al, jai baýdan tek almanyń aport surpyna sýbsidiia beriledi. Onyń da ózindik talaptary bar. Mundai baý teńiz degeiinen 900 metr biiktikte, sonymen qatar egis kólemi 5 gektardan kem bolmaýy tiis. Al onyń ár gektaryna 549 myń teńgeden bastap sýbsidiia alýǵa bolady.
Búgingi kúnde oblys boiynsha jalpy jemis-jidektiń egis kólemi 14,4 myń gektardy quraidy. Biyl 108 myń tonna jemis (2016 j - 91,3 myń t) jinalǵan.
