Elimizde «Serpin-2050» baǵdarlamasy bastalǵaly beri Ońtústik Qazaqstanda 5,5 myńnan astam jas túlek baǵdarlama aiasynda qalaǵan mamandyǵyna túsip, joǵary bilim alyp júr. Bul týraly oblystyq jastar saiasaty máseleleri jónindegi basqarmanyń mamandary málimdedi, dep habarlaidy "Ult aqparat" OQO ákiminiń baspasóz qyzmetine silteme jasap.
Tarqatyp aitsaq, sońǵy úsh jylda 9 oblysqa – Soltústik, Shyǵys, Batys Qazaqstan oblystary men Aqtóbe, Aqmola, Qostanai, Pavlodar, Qaraǵandy jáne Atyraý oblystaryna asqan 5627 túlektiń 4698-i joǵary oqý ornyna tússe, 929 talapker kolledjderde bilimin jalǵastyrypty. Iaǵni, 2014 jyly «Serpin-2050» baǵdarlamasy aiasynda joǵary oqý oryndaryna 1050 grant bólinip, 540 talapker oqýǵa tússe, 2015 jyly 5000 grant bólinip, onyń 2580-in ońtústikqazaqstandyq túlekter jeńip aldy. Al 2016 jyly 3162 grant bólinip, onyń 1578 talapkeri kúngeilik grant iegerleri boldy.
Orta arnaýly oqý oryndardy aitar bolsaq 2014 jyly 1000 grant bólinip, kúngeilik 326 jas oqýǵa tússe, 2015 jyly 34 kolledjge 1200 grant bólinip 359 talapker bilimin jalǵastyrdy. Byltyr 31 kolledjge 1000 grant bólinip, óńirimizden 244 jas oqýǵa tústi.
Mamandardyń málimetinshe, «Serpin-2050» baǵdarlamasy aiasynda 2017 jylǵa 5 myń grand bólinedi eken. Onyń 4 myńy joǵary oqý oryndaryna arnalsa, 1 myńy kolledjder úshin.
Osyǵan orai, 2017 jyldyń basynan beri barlyq aýdan, qalalarda atalǵan baǵdarlamany nasihattaý aiasynda 80 kezdesý ótkizilip, oǵan 8 myńǵa jýyq jas qatysqan. Sonymen birge, taiaýda óńirlerdegi jas túlekter arasynda úgit-nasihat jumystaryn belsendi júrgizý, jiberýshi óńirlerde áleýmettik jobany keńinen aqparattandyryp, tanystyrý maqsatynda «Serpin kúnderi» ótkizildi.
Ońtústik aimaqtardaǵy mektep bitirýshi túlekterge Soltústik aimaqtardaǵy joǵary jáne kásiptik-tehnikalyq bilim berý mekemelerinde bilim berýdi nasihattaýdy iske asyrý maqsatynda 9 oblystaǵy (Soltústik, Shyǵys, Batys Qazaqstan oblystary, Aqtóbe, Aqmola, Qostanai, Pavlodar, Qaraǵanda, Atyraý oblystary) 22 joǵary oqý ornynan jáne 30 orta arnaýly oqý ornynan ókilder kelip, oblystyń barlyq 14 aýdan, qalalarynda - 4 myń halyqpen (ata-ana, ustazdar, mektep bitirýshi túlekter) kezdesý ótkizdi.
