QR SIM resmi ókili Aibek Smadiiarovtyń aitýynsha, qazaqstandyqtardyń Ońtústik Koreia aýmaǵynda maýsymdyq jumys isteýine ruqsat berý boiynsha kelissóz endi bastalǵan, dep habarlaidy QazAqparat.
«Ózderińiz biletindei, Prezident tiisti tapsyrma berip, Qazaqstan men Ońtústik Koreia arasynda maýsymdyq jumystardy júrgizýge ruqsat berilsin degen bolatyn. Ol másele áli bastapqy deńgeide. Sondyqtan, qazir Koreia tarapymen bul másele boiynsha jumys istep jatyrmyz. Ázirge aitarlyqtai aqparat joq. Kelissóz endi bastaldy», - dedi Aibek Smadiiarov vedomstvoda ótken brifing barysynda.
QR SIM resmi ókiliniń aitýynsha, Ońtústik Koreiada zańsyz júrgen qazaqstandyqtardyń sany azaiyp keledi.
Ońtústik Koreiada Qazaqstan azamattary aýyl sharýashylyǵy salasynda zańdy túrde jumys isteýi múmkin ekeni buǵan deiin habarlanǵan bolatyn.
