QR Syrtqy ister ministrliginiń resmi ókili Aibek Smadiiarov Ońtústik Koreiada kólikpen bala qaǵyp ketken jigitke qatysty derektermen bólisti, dep habarlaidy QazAqparat.
«Ózderińizde biletindei, azamatymyz óz erkimen Seýl qalasyna bardy. Bul Koreia tarapymen kelissózder barysynda júzege asyryldy. Qazirgi ýaqytta ol Chýnbon qalasynyń tergeý izoliatorynda otyr. Tergeý amaldary bastaldy. Búgin bizdiń konsýl tergeýshimen, sonymen qatar azamatymyzben kezdesedi. Biz onyń barlyq quqyqtarynyń qorǵalyp, saqtalýyn qadaǵalap otyramyz. Advokat memleket qarjysy esebinen Koreia tarapynan usynylady. Eger óz qarajatyna jaldaǵysy kelse, biz oǵan jaqsy advokat taýyp beremiz. Sondyqtan qandai da bir qorytyndy shyǵarýǵa áli erte dep oilaimyz. Tergeý barysy barlyq mán-jaidy anyqtap, sot bolady. Onda koreia tarapy munyń barlyǵyn egjei-tegjeili qarastyrady», - dedi resmi ókil.
Onyń atap ótýinshe, Qazaqstan azamatynyń ústinen qylmystyq is qozǵalǵan. Qandai jazanyń taǵaiyndalatyndyǵy búgin Qazaqstan konsýlynyń tergeýshimen kezdesýi barysynda anyqtalady.
«Ol Koreiada ótken jyldan beri 1 jyldan astam ýaqyt boiy zańsyz júrgen. Jáne qylmys jasalǵan sátte qorqyp, qashyp ketken. Neberi 20 jastaǵy jas jigit. Biraq oqiǵanyń kúrdeligin túsinip, óz erkimen oqiǵa oryn alǵan jerde qaityp oraldy.
Onyń ápkesi de Koreiada zańsyz júrip jumys istegen. Biraq, onyń atalǵan oqiǵaǵa, jol-kólik apatyna esh qatysy joq. Mán-jaidy anyqtaý jas jigittiń tóńireginde júrgizilýde. Ol qazirgi ýaqytta Qazaqstan aýmaǵyna oraldy jáne úiine ketip barady
Al koreialyq balanyń jaǵdaiy jaqsaryp kele jatyr. Qazir ózdiginen júrip-tura alady. Bári jaqsy, saýyǵyp ketetindigine senimdimiz», dedi Aibek Smadiiarov.
Eske sala keteiik, biraz ýaqyt buryn Qazaqstan azamaty Ońtústik Koreiada kishkentai balany qaǵyp, oqiǵa ornynan izin sýytqan edi.
Biraz ýaqyttan keiin onyń Pavlodarda júrgeni belgili boldy. qazanda Qazaqstan azamaty tergeý is-sharalaryna qatysý úshin Seýl qalasyna óz erkimen ushyp bardy.
