Foto: Yonhapnews
Ońtústik Koreia shekarasynan zańsyz ótpek bolǵan qazaqstandyqtardyń týystary "1001 tún" baǵdarlamasyna kelip, oqiǵanyń mán-jaiyn aitty, - dep habarlaidy Massaget.kz portaly.
"Ákem - múgedek, anam aýyryp jatyr. Anamnyń otasyna qarjy kerek edi. Inim "Saiat degen jigit qujattardy rettep beredi, men 1-2 aiǵa baryp kelemin" dedi. Sol jigit qujattaryn daiyndap berdi. Inim ákemniń batasyn aldy da, Koreiaǵa ushyp ketti. Biraz ýaqyttan soń jylap qońyraý shaldy. "Ótpei qaldym" dedi, ákem "eshteńe etpeidi, elge oral" dep edi, "anama ota qajet qoi, menen basqa kimge úmit artasyzdar" dep jalady. Ákem "buiyrǵany" dep jubatty. Odan keiin habarlaspady. Biz jertólege túsken shyǵar dep onsha alańdamadyq. Burynnan Korea Komek degen Instagram-paraqshaǵa tirkelgenmin. Paraqshada Nursultan men Úmitjannyń týǵandary habarlassyn dep jazylǵan, men oǵan mán bermedim. Taǵy bir qarasam, inimniń ushqan kúni jazylǵan. Olar kedennen qashyp ketken delingen. Inime habarlassam, telefony sóndirýli. Keiin Samat (Korea Komek Instagram-paraqshasynyń iesi - esk.) habarlasty. Ol balalar 24 saǵattyń ishinde ustalsa, Qazaqstanǵa qaitaryp jiberemiz, olar sottalmaidy" dedi", - dep eske aldy ustalǵan jigittiń ápkesi.
Biraz ýaqyt ótken soń Úmitjan ápkesine habarlasyp, qashpaq oiy bolmaǵanyn, nege mundai áreketke barǵanyn túsinbegenin aitqan. Ápkesi Úmitjanǵa Samattyń nómirin berip, oǵan habarlasýyn ótingen.
"Bir kezde paraqshada qolynda kiseni bar Úmitjannyń sýretin kórdim. Men birden Samatqa "ol ustalmady ǵoi, ózi baryp berildi ǵoi" dep edim, "solai bolýy kerek" dep jaýap qaitardy. Oǵan jaraidy dedim. Keiin Samat maǵan habarlasyp, "3 million von, 1 million 50 myń teńge berseńiz, "balańyz sottalmaidy ne 2 aiǵa ǵana sottalady" dedi. Men áke-sheshemniń jaǵdaiyn aittym. Qolymda 310 myń teńge baryn aityp edim, "bolmaidy" dedi. Birazdan soń taǵy habarlasyp, 500 myń teńgege keliskenin aitty. Sosyn "advokat kele jatyr, 500 myń teńge daiyndaisyzdar ma, álde bala sottala bersin be?" dedi. Men túnde kórshilerden qaryzǵa aqsha jinap, salyp jiberdim. 24 saǵatta balany elge jiberemin degen Samat keiin 3 kúnnen soń jiberemin dedi. Biraq baladan áli habar joq", - deidi ol.
Samat Úmitjannyń ata-anasyna elshilikten habarlasyp turmyn dep jazǵan. Onyń týysqandary bul aqparatty teksermei, aitqan sózine sengen. Úmitjannyń ápkesi Ońtústik Koreiadan jinalǵan aqsha túspegenin aityp, jalǵan aqparatqa senbeýge shaqyrdy.
Ekinshi qazaqstandyq Nursultan Yrysbaevtyń ákesi Rýslan Omarov ulynyń Ońtústik Koreiada zańsyz jumys isteýge bara jatqanyn o bastan bilgen. Ol uly ustalǵannan keiin oǵan habarlasa almai jatqanyn aitty.
Úmitjan ápkesiniń aitýynsha, Qazaqstannyń Ońtústik Koreiadaǵy elshilik ókilderi shekarany zańsyz kesip ótken qazaqstandyqtarmen 11 sáýirde kezdesedi.
Eske salaiyq, buǵan deiin qos qazaqstandyq Ońtústik Koreia shekarasyn zańsyz kesip ótpek bolǵanyn habarlaǵan edik. Olar Ońtústik Koreiaǵa biyl 24 naýryzda Tashkentten barǵan.
