Koreia Respýblikasyna kirýge ruqsat berilmegen Qazaqstannyń qos azamaty Inchhon halyqaralyq áýejaiynan qashyp ketti. Aqparatty QR Syrtqy ister ministrliginiń baspasóz qyzmeti rastady, - dep habarlaidy "Ult aqparat".
Otandastarymyzdyń qashqany týraly aqparat áleýmettik jeli paraqshalarynda tarady. Jeli qoldanýshylary jeksenbide tańǵy saǵat 4:20 shamasynda deportatsiia reisin kútip turǵan 21 jáne 18 jastaǵy eki qazaqstandyqtyń áýejaidyń ushý-qoný jolaǵy janyndaǵy qorshaýdan asyp, qashyp ketkenin jazǵan.
Syrtqy ister ministrliginiń málimetinshe, olar Ońtústik Koreiaǵa 24 naýryzda Tashkent qalasynan ushyp shyqqan «Koreana» áýekompaniiasynyń reisimen kelgen. Keiin elge kirýge tyiym salynǵandyqtan, deportatsiialyq reisti kútken.
Alaida qazaqstandyqtar Inchhon halyqaralyq áýejaiynan zańsyz qashyp ketken. Olardyń birin jergilikti politsiia ustady. Ekinshisi izdeýde.
«Qazaqstannyń Seýl qalasyndaǵy Elshiligi osy másele boiynsha Koreia Respýblikasynyń ýákiletti organdarymen turaqty bailanysta.
Bul oqiǵa Ońtústik Koreiada qoǵamdyq rezonans týdyrdy jáne jergilikti BAQ-ta keńinen jariialandy. Óz kezeginde bul jaǵdai bolashaqta Koreia Respýblikasynyń quqyq qorǵaý jáne immigratsiialyq organdaryn Qazaqstan azamattarynyń elde zańsyz bolýymen belsendi kúreske, sondai-aq azamattarǵa elge kirý tártibin qatańdatýǵa itermeleýi múmkin ekendigin atap ótken jón», - delingen QR SIM habarlamasynda.
