Ońtústik Koreia koronavirýs infektsiiasy kóp tirkelgen elderdiń qatarynda bolǵandyqtan, birinshi «A» sanatyna qosylýy múmkin. Bul týraly Almaty qalasy taýarlar men qyzmetterdiń qaýipsizdigin baqylaý departamenti basshysynyń orynbasary Ásel Qalyqova brifing kezinde málimdedi, dep habarlaidy QazAqparat.
«Búginen bastap Ońtústik Koreiany 1 «A» sanatyna qosý josparda. Resmi rastaýdy kútip otyrmyz. Bul epidemiologiialyq jaǵdaiǵa, iaǵni koronavirýstyń únemi jańa jaǵdailary tirkelýine bailanysty (Ońtústik Koreiada). Ár minýt, saǵat saiyn monitoring júrgizilip otyr», - dedi Ásel Qalyqova.
Onyń aitýynsha, eger Ońtústik Koreia birinshi «B» -dan birinshi «A» sanatyna aýyssa, tiisti profilaktikalyq sharalar qoldanylady.
Búgingi tańda 1 A sanatynda Qytai men Iran bar. Bul elderden kelgender 14 kúnge karantinge oqshaýlanady. Sodan keiin, taǵy 10 kún dárigerlerdiń baqylaýynda bolady.
Almaty qalalyq qoǵamdyq densaýlyq saqtaý basqarmasynyń bastyǵy Tileýhan Ábildabaevtyń aitýynsha, karantin koronavirýstyń aldyn alý úshin qajet.
«Karantin qaýipsizdik úshin kerek. Búgingi kúni karantinge jatqyzylǵan jáne qaýipti aimaqtan kelgenderdiń arasynda koronavirýs infektsiiasy anyqtalǵan joq», - dedi ol.
Aita keteiik, qazirgi ýaqytta álemde COVID-19 virýsyn juqtyrǵandar sany 90 893 adam jáne odan 3110 adam qaitys boldy.
Sońǵy eki táýlikte Qytaidan tysqary jerde tirkelgen 1848 naýqastyń 80%-y úsh elge tiesili: Iran, Italiia jáne Ońtústik Koreia.
