El aimaqtarynda sporttyq quramalardyń daiyndyǵy máz emes. Sonymen qosa sportshylardy jas ereksheligine qarai jattyqtyratyn bapkerler joqtyń qasy. Atalǵan máseleni QR Mádeniet jáne sport ministrligi sport jáne dene shynyqtyrý isteri komitetiniń tóraǵasy Samat Erǵaliev kóterdi, dep habarlaidy QazAqparat.
«Ózderińizge belgili, biyl aqpanda ulttyq olimpiada komitetinen memlekettik tapsyrys keri qaitaryp alyndy. Osylaisha 1 sáýirden bastap bul fýnktsiiany bizdiń vedomstvoǵa baǵynysty sportty damytý direktsiiasy iske asyrady. Direktsiia ulttyq qurama komandalarynyń aldaǵy keshendi jáne halyqaralyq jarystarǵa daiyndyǵymen ainalysady. Qazirgi tańda óńirlerde oblystyq quramalardyń daiyndyǵy bei-bereket júrgizilip jatyr. Sport túrleri boiynsha jas erekshelikterine qarai jaýapty jattyqtyrýshylar joq», - dedi Samat Erǵaliev ortalyq kommýnikatsiialar qyzmetinde ótken baspasóz máslihatynda.
Onyń aitýynsha, ministrlik joǵaryda atalǵan olqylyqtardy joiýdy qolǵa alady.
«Óńirlerde osy jumystyń bárin ortalyqtandyryp, jaýapty mekemeni belgileý maqsatynda ministrlik joǵary sporttyq sheberlik mektebin sportty damytý direktsiiasy etip qaita qurýdy usynyp otyr. Ondaǵy maqsat - oblystyq qurama komandalardy durys jasaqtaý, sportshylardyń oqý-jattyǵý jiyndary men jarystarǵa júieli túrde qatysýy, búkil jas erekshelikteri boiynsha aǵa jattyqtyrýshylardyń jaýapkershiligi zańdastyrylady», - deidi ol.
Sondai-aq, komitet basshysy óńirlerdegi dene shynyqtyrý jáne sport basqarmalarynyń jumysy jeńildei túsetinin aitty. Iaǵni, sport saiasatyn júrgizýde sala mekemeleriniń qyzmeti sapaly túrde úilestiriledi.
Spikerdiń sózinshe, atalǵan shara sport salasynda sybailas jemqorlyqtyń aldyn alýǵa múmkindik bermek.
