QR Premer-Ministri Asqar Mamin Úkimettiń Tsifrlyq keńsesinde ortalyq memlekettik organdar basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlarynyń (ÁMAT) baǵalaryn retteý máseleleri jóninde keńes ótkizdi, dep habarlaidy primeminister.kz saity.
Qazirgi jaǵdai men atqarylyp jatqan jumystar týraly saýda jáne integratsiia ministri Baqyt Sultanov, aýyl sharýashylyǵy ministri Erbol Qarashókeev, Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov, Nur-Sultan qalasynyń ákimi Altai Kólginov, Shyǵys Qazaqstan oblysynyń ákimi Danial Ahmetov, Soltústik Qazaqstan oblysynyń ákimi Qumar Aqsaqalov, Qyzylorda oblysynyń ákimi Gúlshara Ábdiqalyqova, Pavlodar oblysynyń ákimi Ábilqaiyr Sqaqov, Almaty oblysynyń ákimi Qanat Bozymbaev jáne t. b. baiandady.
Ótken aptada Qazaqstanda áleýmettik mańyzy bar azyq-túlik taýarlarynyń baǵasy 0,1%-ǵa tómendedi. Túrkistan oblysynda 0,6%-ǵa, elordada 0,3%-ǵa, Shymkent qalasynda jáne Mańǵystaý oblysynda 0,2%-ǵa, Almaty qalasynda jáne Qaraǵandy oblysynda 0,1%-ǵa baǵanyń tómendeýi tirkeldi.
Jalpy, respýblika boiynsha kókónister baǵasynyń tómendeýi jalǵasýda. Qalǵan basqa ónimderdiń baǵalary turaqty.
2021 jyly 769,3 myń tonna ónimge, onyń ishinde 684 myń tonna jumsaq bidaiǵa kelisimshart jasaldy. Qazirgi ýaqytta 559 myń tonna nemese kelisimshart jasalǵan kólemniń 72,7% jetkizildi.
Qazirgi tańda Básekelestikti qorǵaý jáne damytý agenttigi naryq sýbektileriniń atyna 113 habarlama jiberdi, 16 tergeý júrgizdi, óndirýshilermen, kóterme jetkizýshilermen jáne saýda jelilerimen saýda ústemesin 15%-dan 10%-ǵa deiin tómendetý týraly monopoliiaǵa qarsy komplaenstiń 192 aktisin jasady. Saýda ústemesin kóterýdiń 75 faktisi anyqtaldy.
Biylǵy 10 jeltoqsannan bastap Qazaqstannyń jumyrtqa óndirýshiler qaýymdastyǵy respýblikanyń barlyq qus fabrikalary boiynsha taýyq jumyrtqasynyń baǵasyn 16%-ǵa – bir danasyna 37 teńgeden 32-31 teńgege deiin tómendetti.
Premer-Ministr ortalyq memlekettik jáne jergilikti atqarýshy organdarǵa qoldanystaǵy barlyq quraldardy paidalaný arqyly áleýmettik mańyzy bar azyq-túlik ónimderiniń baǵasyn turaqtandyrý jáne tómendetý jumysyn odan ári jalǵastyrýdy tapsyrdy.
