Qyzylorda, Atyraý jáne Túrkistan, Pavlodar oblystarynda koronavirýs indetin juqtyrýdyń jańa jaǵdailary naýqas adamdarmen bailanysta bolǵandar arasynda anyqtaldy, dep habarlaidy QazAqparat.
Buǵan deiin habarlaǵanymyzdai, 10 sáýir saǵat 20.15-tegi jaǵdai boiynsha, Qazaqstanda infektsiiaǵa shaldyǵýdyń jańadan 6 oqiǵasy tirkeldi. Onyń ishinde Almaty qalasynda - 1, Pavlodar oblysynda – 1, Atyraý oblysynda - 2, Qyzylorda oblysynda - 1, Túrkistan oblysynda 1 adam anyqtaldy.
Memlekettik komissiianyń shuǵyl shtabynan málim etkendei, Qyzylorda oblysynda koronavirýs infektsiiasyn juqtyrǵan 49 jastaǵy naýqas Syrdariia aýdany, Amangeldi aýylynyń turǵyny. Ol indetke shaldyqqan adammen qarym-qatynasta bolǵan. Soǵan bailanysty odan zerthanalyq synamalar alynyp, COVID-19 diagnozy rastalǵan. Qazirgi tańda bekitilgen hattamaǵa sáikes em júrgizilýde.
Sońǵy resmi málimetke sáikes, Qyzylorda oblysynda indetti juqtyrǵan 105 adam bar.
Atyraý oblysynda COVID-19 2 adamnan anyqtaldy. Ekeýi de Atyraý qalasynda tirkeldi. Olar buǵan deiin naýqaspen qarym-qatynasta bolǵan.
«Olardan zerthanalyq synamalar alynyp, PTR diagnostikalyq zertteý nátijeleri boiynsha COVID-19 diagnozy anyqtaldy. Olar juqpaly aýrýlar aýrýhanasyna jatqyzyldy. Jaǵdailary qazir qanaǵattanarlyq, bekitilgen hattamaǵa sáikes em alýda. Naýqastarmen qarym-qatynasta bolǵan adamdar anyqtalyp, barlyǵy meditsinalyq baqylaýǵa alyndy. Aýrý oshaqtarynda epidemiologiialyq tekserý, dezinfektsiialyq jumystar júrgizilip jatyr», - delingen Memlekettik komissiianyń shuǵyl shtabynyń aqparatynda.
Sońǵy derekterge sáikes, Atyraý oblysynda COVID-19 barlyǵy 47 adamnan anyqtaldy.
Sondai-aq infektsiiasyn juqtyrǵan taǵy 1 adam Túrkistan oblysynda tirkeldi.
«Arys qalasynyń turǵyny virýs juqtyrǵan adammen tyǵyz qarym-qatynasta bolýyna bailanysty karantindik statsionarǵa jatqyzylǵan. QR Bas memlekettik sanitarlyq dárigerdiń qaýlysyna sáikes zerthanalyq synamalar alynyp, diagnoz naqtylandy. Qazirgi tańda jaǵdaiy qanaǵattanarlyq. Bekitilgen hattamaǵa sáikes tiisti em júrgizilýde. Naýqaspen qarym-qatynasta bolǵan adamdar anyqtalyp, barlyǵy meditsinalyq baqylaýǵa alynýda. Aýrý oshaqtarynda epidemiologiialyq tekserý, dezinfektsiialyq jumystar júrgizilip jatyr», - dedi Memlekettik komissiianyń shuǵyl shtabynan.
Osy ýaqytta Túrkistan oblysynda COVID-19 indetiniń rastalǵan 35 oqiǵasy bar: Jetisaida – 14, Ordabasyda – 2, Sairamda – 2, Maqtaaralda – 4, Saryaǵashta – 1, Kentaýda – 5, Arysta – 7 adam.
Pavlodar oblysynda jańadan tirkelgen naýqas jedel járdem qyzmetiniń feldsheri ekenin buǵan deiin jazǵan bolatynbyz. Ol qaitys bolǵan syrqat adammen bailanysta bolǵan.
10 sáýir saǵat 20.15-tegi sońǵy málimet boiynsha, Qazaqstanda indetke shaldyqqandar sany 808-ge jetti.
