Búgin Almaty oblysy ákimi Amandyq Batalovtyń tóraǵalyǵymen oblystyń I toqsandaǵy áleýmettik-ekonomikalyq damý qorytyndylary talqylanǵan ákimdik otyrysy ótti. Sonymen qatar II toqsannyń mindetteri qaraldy.
Jiyndy ashqan oblys ákimi Amandyq Batalov aldymen QR Premer-Ministriniń orynbasary Gúlshara Ábdiqalyqovanyń oblysqa jasaǵan eki kúndik saparynyń qorytyndylaryna toqtaldy:
- Vitse-premer Gúlshara Ábdiqalyqova bastaǵan úkimettik delegatsiia Taldyqorǵanda, Tekelide jáne jaqyn aýdandarda boldy. Munda Elbasynyń «Áleýmettik qamqorlyq» jańa áleýmettik sharalaryn túsindirip, atamysh sharalardyń oblysta qalai júzege asyrylyp jatqanyn kórdi. Sapar qorytyndysy boiynsha óńirdegi isterge oń baǵa berildi. Bul baǵyttaǵy jumystardy áli de jalǵastyra beremiz. Aýdan, qala ákimderi jergilikti jerlerde tyndyrymdy ister atqaryp, halyq arasynda aqparattyq-túsindirý jumystaryn júrgizýi tiis. Halyqqa qyzmet kórsetý ortalyqtarynyń jumysyn jaqsarta túsý, sol siiaqty qyzmet kórsetý salasyndaǵy mamandardyń halyqpen jumys istegendegi ózin ustaý mádenietin jetildirý týraly tapsyrmalar berdim. Mamandar óz laýazymdyq mindetterin jaqsylap oryndap qana qoimai, neǵurlym shydamdy, adamgershilikti bolýy tiis, - dedi A. Batalov. Munan soń sózdi orynbasary Jeńis Tuiaqovqa berdi.
Baiandama jasaǵan Jeńis Tuiaqov oblysta atalǵan merzimde ónerkásip óndirisiniń 3,7 %-ke, aýyl sharýashylyǵynda – 2,2 %-ke, bólshek saýdadaǵy taýar ainalymy – 3,7 %-ke óskenin atap ótti. 86,1 mlrd. teńge investitsiia tartylyp, ósim 2,9 %-ti quraǵan. Barlyǵy 5144 jumys orny quryldy.
Jeńis Tuiaqov oblysta Elbasynyń «Nur Otan» partiiasynyń XVIII sezinde bergen tapsyrmalaryn júzege asyrý sheńberinde jasalǵan jumystardyń barysyna da keńinen toqtaldy. Máselen, biylǵy jyldyń 1 shildesinen bastap biýdjettik salada tómen jalaqy alatyn mamandardyń jalaqysy 30 %-ke ósip, oǵan 100 myńnan astam adam qamtylmaq. Sol siiaqty atqarýshy organdardyń 3,5 myń tómengi qyzmetkerleri 25 % ósimmen jalaqy alatyn bolady. «Áleýmettik qamqorlyq» jańa áleýmettik sharalary sheńberinde 1 sáýirden bastap ataýly áleýmettik kómek alatyndar sany 11 myńnan 17 myń otbasyǵa deiin ósti. 1 maýsymnan bastap múgedek balalardy tárbieleý járdemaqysynyń kólemi 30 %-ke ulǵaityldy. Sol siiaqty oblystyń Áleýmettik kartasyna 13 736 otbasy engizildi. Bul oraida biylǵy jyly Áleýmettik qyzmet pen qoldaý sharalarynyń biryńǵai paketine jergilikti biýdjetten 6 mlrd. teńge, sonyń ishinde Áleýmettik karta sheńberinde kóp balaly jáne az qamtylǵan otbasylarǵa 3,4 mlrd. teńge bólindi.
Sóziniń qorytyndysynda spiker II toqsannyń mindetterine de toqtaldy. Bul rette ekonomikanyń 4 % ósimin qamtamasyz etý mindeti turǵanyn atap ótti.
Baiandamadan soń Panfilov aýdanynyń ákimi Termirlan Bektasov pen oblystyq qurylys basqarmasynyń basshysy Dáýren Joljanov jaryssózge shyqty.
T.Bektasovtyń I toqsandaǵy jumystary týraly sózin tyńdai kele, oblys ákimi aýdanda kásipkerlermen birlese is atqarý kemshin ekenin aitty
- Biznestiń áleýmettik jaýapkershiligi týraly Elbasy únemi aityp keledi. Elimizde kásipkerlerge memleket tarapynan barlyq qajetti kómekter kórsetilip otyr. Sondyqtan biznes-kaýymdastyq ókilderiniń de múmkindiginshe kómekke muqtaj jandarǵa qol ushyn sozǵanyn, ásirese, turǵyn úi jaǵynan qoldaý kórsetkenin qalaimyz. Oǵan qosa aýdanda et eksporttaý isi baiaý júrip jatyr. Aýdanda náreste ólimine nege jol berildi? Onyń sebebi anyqtaldy ma, keleside qaitalanbas úshin qandai sharalar qoldanyldy? – dep surady A. Batalov aýdan ákiminen.
T.Bektasov aýdandaǵy meditsina mamandarynyń kásibiligin arttyrý maqsatynda qazirgi kezde Akýsherlik jáne ginekologiialyq ǵylymi ortalyqpen memorandým jasalǵanyn tilge tiek etti. 10 sáýirden bastap 30 dáriger, al mamyr aiynan orta býyndaǵy taǵy 30 meditsina mamany biliktiligin arttyratyn bolady. Al et eksportyna keletin bolsaq, alǵashqy kezeńde 70 tonna et eksporttaý josparlanǵan. Panfilov aýdanynyń ákimi T. Bektasov jalpy jyl sońyna deiin syrt elderge 200 tonna et ótkizemiz dep sendirdi.
Amandyq Batalov kelesi dúisenbide aýdandaǵy kóp balaly otbasylarǵa áleýmettik kómek kórsetý máselesi boiynsha esep berýdi tapsyrdy:
- Osy másele boiynsha qandai jumystar atqarylǵany týraly maǵan naqty derekter aitatyn bolasyń. Ázirge men Panfilov aýdanynan tiisti deńgeidegi jumysty kórip turǵan joqpyn. Bul máselemen árbir aýdan, qala ákimderi jedel ainalysyp, iske kirisýi kerek, - dedi ol.
Oblystyq qurylys basqarmasynyń jumysy da qatań synǵa alyndy.
- Qazir Elbasynyń tapsyrmasy boiynsha qolǵa alynǵan «Baqytty otbasy» baǵdarlamasy kóp balaly otbasylardy baspanamen qamtamasyz etýge arnalǵan. Biylǵy jyly bul baǵytta respýblikalyq biýdjetten qosymsha 5,6 mlrd. teńge bólingen. Endi jedel túrde oblys aýdan, qalalary boiynsha bólý kerek, eń aldymen baspanaǵa zárý kóp balaly otbasylar kóp turatyn aimaqtardy eskerý kerek. «7-20-25» baǵdarlamasyn júzege asyrý turaqty júrgizilýi kerek, únemi baqylaýda bolyp, tolyqqandy nátije berýi tiis. Qurylys basqarmasynda bastamashyldyǵy joq, olardan naqty usynystar áli estimedim. Kezekte turǵan azamattardy turǵyn úimen qamtý máselesin sheshý kerek. Qazan aiynda kelesi jylǵa arnalǵan úiler qurylysynyń daiyndamasyn jasap úlgerý kerek. Osy máselelerdiń barlyǵyna shiraq, jyldam kirisińder, - dedi A. Batalov.
Jiyn sońynda oblys ákimi taǵy da birneshe tapsyrma berdi:
- 2019-2020 jylǵy jylytý maýsymyna daiyndyqty qazirden bastaý kerek. Kóktemgi dala jumystary tiisti aýdandarda óz deńgeiinde ótýi tiis. Biz óz tarapymyzdan tuqymmen, janar-jaǵarmaimen qamtamasyz etemiz. Al jergilikti ákimdikter kúndelikti týyndap otyrǵan máselelerdi der kezinde sheship, baqylaýda ustasyn. Biýdjettiń oryndalýy erekshe nazarda bolsyn. Barlyq jumys úzdiksiz, úzilissiz júrýge tiis. Jalpy I toqsannyń qorytyndysy boiynsha qatań eskertýler joq, biraq áli de jumysty shiratýdy qajet etetin baǵyttar bar, máselen, qurylys salasynda. Alǵashqy toqsanda óndiriste de, aýyl sharýashylyǵynda da ósim saqtaldy. Osy qarqyndy baiaýlatpai, odan ári de órkendeýge jumys isteýdi suraimyn, - dedi Amandyq Batalov.
