Qazaqstanda ónerkásiptik saiasat jónindegi vedomstvoaralyq komissiia qurylady. Bul týraly QR Indýstriia jáne infraqurylymdyq damý ministri Beibit Atamqulov málim etti, dep habarlaidy QazAqparat.
«Ónerkásiptik saiasat máni boiynsha óndiristik naryqtyń barlyq qatysýshylarynyń birdei jaǵdai jasalýy kerek. Zań jobasynda ekonomikalyq, ákimshilik, quqyqtyq, institýtsionaldyq jáne basqa jaǵdailardy qamtityn ónerkásiptik klimat uǵymyn engizemiz. Ónerkásiptik klimattyń jai-kúiin baqylaýdy Indýstriia jáne infraqurylymdy damytý ministrligi júzege asyrady. Onyń nátijeleri bolashaq kezeńderge arnalǵan ónerkásiptik saiasatty qalyptastyrý kezinde eskeriledi. Osy monitoring negizinde basqarý sheshimderi qabyldanyp, memlekettik organdar jumysynyń tiimdiligi baǵalanady», - dedi Beibit Atamqulov Senatta ótip jatqan «QR ónerkásiptik saiasatty zańnamalyq retteý: jai-kúii, problemalary jáne sheshý joldary» taqyrybyndaǵy Úkimet saǵatynda.
Ónerkásiptik saiasatty jáne memlekettik yntalandyrý sharalaryn iske asyrý úshin birinshi kezekte óndiriste saýda qyzmeti rettelip, investitsiia tartylyp, innovatsiialardy damytý arqyly ónerkásiptik saiasatty qalyptastyrý men júzege asyrýdyń tiimdi vedomstvoaralyq úilestirýin qamtamasyz etýden turatyn institýtsionaldyq bazany shoǵyrlandyrý qajet.
«Búgingi tańda óndiriske qatysty fýnktsiialar ártúrli vedomstvalar arasynda bólingen. Indýstriialyq damý úshin Indýstriia jáne infraqurylymdy damý ministrliginiń, saýda saiasaty jáne ekonomikalyq integratsiia – Saýda jáne integratsiia ministrliginiń, innovatsiialyq damý Tsifrlyq damý, innovatsiia jáne aeroǵarysh ónerkásibi ministrliginiń, sheteldik investitsiialardy tartý Syrtqy ister ministrliginiń mindetinde. Ónerkásiptik saiasatty úilestirýdi qamtamasyz etý úshin negizgi zań jobasynda Premer-Ministrdiń orynbasary basqaratyn Ónerkásiptik saiasat jónindegi vedomstvoaralyq komissiia qurý qarastyrylǵan. Al onyń músheleri memlekettik organdar basshylarynyń orynbasarlary, ónerkásiptik kásiporyndardyń ókilderi qoǵam qairatkerleri, depýtattar jáne basqa da múddeli tulǵalar bolady», - dedi ol.
Jańadan qurylatyn ónerkásiptik saiasat jónindegi vedomstvoaralyq komissiiaǵa birqatar quziret berilmek.
«Ónerkásiptik saiasat jónindegi vedomstvoaralyq komissiia birqatar quzyretke ie bolady. Atap aitqanda, jańa yntalandyrý sharalaryn engizý, qoldanystaǵy yntalandyrý sharalaryn qaita qaraý jáne joiý týraly Úkimetke usynystar qalyptastyrý mindeti qarastyrylǵan. Sonymen qatar ol komissiia indýstriialyq saiasat boiynsha halyqaralyq uiymdarda kelissózderdi qosa alǵanda, Úkimettiń pozitsiiasyn daiyndaidy. Ónerkásiptik saiasat máseleleri boiynsha memlekettik organdar arasyndaǵy kelispeýshilikter týraly sheshim qabyldaidy. Sondai-aq ónerkásiptik saiasatty iske asyrý týraly esepterdi tyńdaidy», - dedi Indýstriia jáne infraqurylymdyq damý ministri Atamqulov Senatta ótip jatqan «QR ónerkásiptik saiasatty zańnamalyq retteý: jai-kúii, problemalary jáne sheshý joldary» taqyrybyndaǵy Úkimet saǵatynda.
Sondai-aq komissiia institýtsionaldyq qoldaý sheńberinde zań jobasy Ónerkásipti damytý qoryn men «Ónerkásip» aqparattyq júieni qurý men júzege asyrý máselelerin retteidi.
