"Óner barysy" respýblikalyq týrniriniń bas júldesi Asylhan Tólepovke buiyrdy, dep habarlaidy QazAqparat tilshisi.
Týrnirdiń jeńil salmaqtaǵy bas júldesi úshin Qazaqstan Jastar odaǵy "Serper" jastar syilyǵynyń laýreattary, kino akterleri Aian Ótepbergen men Asylhan Tólepov beldesti. Tartysty ótken kezdesýde aldymen Asylhan búk upaiyn enshilese, ile-shala Aian da óz qorjynyna dál osyndai upai sala aldy. Alaida, negizgi ýaqytta palýandardyń esepteri teń aiaqtaldy. Osydan keiingi beldesýde qoly belbeýden shyǵyp ketken Aian jeńisti Asylhanǵa berip qoidy.
Aita keteiik, "Óner barysy" respýblikalyq týrniriniń qola júldesi aýyr salmaqta Erkebulan Daiyrovqa, al jeńil salmaqta Abai Aiazbaev buiyrǵanyn habarlaǵan edik.
Esterińizge sala ketsek, «Óner Barysy» respýblikalyq týrniri elordadaǵy "Dáýlet" sport kesheninde ótti. Týrnirge jiyrmaǵa jýyq palýan qatysty. Olardyń ishinde birde-bir kásipqoi sportshy joq. Barlyǵy da Qazaqstan halqy jaqsy tanityn ártister men mýzykanttar, ánshiler, aityskerler, akterler, KTA-ǵa qatysýshylar. Olardyń qatarynda Qairat Nurtas, Abai Aiazbaev, Serik Ibragimov, Meiirjan Tórebaev, Amangeldi Óteshov, Asylhan Tólepov, Artýr Tólepov, Aian Ótepbergen, Nurlan Musaev, Erkebulan Daiyrov, Álibek Serǵaliev, Nurbolat Abdýllin syndy ónerpazdar bar.
