Qazaqstannyń eńbek sińirgen qairatkerleri otandastaryn COVID-19 ekpesin alýǵa shaqyrady, dep habarlaidy "Ult aqparat".
Olardyń pikirinshe, jappai vaktsinalaý arqyly ujymdyq immýnitet qalyptasqanda ǵana pandemiiany jeńemiz.
Óner ieleri vaktsinadan keiin ózderin jaqsy sezinetinderin aitty.
«Biz qazir vaktsinanyń arqasynda koronavirýstan qorǵanýǵa bolatynyn bilemiz. Men barlyq qala turǵyndaryn vaktsina alýǵa shaqyramyn. Mysaly, Izrailde halyqtyń 95%-y vaktsina aldy. Qazir bul el betperdesiz júr. Nege biz olardan úlgi almaimyz. Men adamdardyń sharshaǵanyn kóremin. Eger biz bárimiz vaktsina alatyn bolsaq, onda ol aiaqtalady», - dedi Qazaqstannyń eńbek sińirgen qairatkeri, ánshi Muqasan Shahzadaev.
Qaragóz Súleimenovanyń aitýynsha, vaktsina – qaterli indetti joiýdyń jalǵyz joly.
«Indet kezinde kóptegen adam qaitys boldy. Dári-dármekter jetkiliksiz boldy. Al qazir bizde óz vaktsinamyz bar, sondai-aq tańdaý úshin birneshe tiimdi túrleri shyqty. Vaktsina – qaterli indetti joiýdyń jalǵyz joly», – dep atap ótti Qazaqstannyń eńbek sińirgen qairatkeri Qaragóz Súleimenova.
Vaktsina alǵandardyń arasynda Roza Rymbaeva, Jan Baijanov, Ermahan Ibragimov, Olga Shishigina, Múslim Jylqybaev, Rizat Mahashev, Lev Cherepanov, Áli Oqapov, Baian Alagózova, Dias Ablaev, Erjan Muhataev jáne taǵy basqalary bar.
Eske salsaq, turǵyndar vaktsinany kez kelgen pýnktten ala alady. Qala boiynsha 211 ekpe pýnkti bar. Olar emhanalarda, saýda ortalyqtarynda, bazarlarda, mektepterde, mádeniet nysandarynda ornalasqan jáne kún saiyn demalyssyz tańǵy 8-den keshki 20:00-ge deiin jumys isteidi. Jalpy, Almatyda vaktsina alǵan qala turǵyndarynyń sany 329 myńnan asty.
