QR Tótenshe jaǵdailar ministrligi Ónerkásiptik qaýipsizdik komitetiniń tóraǵasy Nyǵmetjan Maqajanov 2021 jyly uiymdarǵa júrgizilgen tekserýler týraly málimet berdi, dep habarlaidy QazAqparat.
«Esepti kezeńde erekshe tártip boiynsha 630 josparly tekserý jáne jospardan tys 371 tekserý júrgizildi. Sonyń aiasynda 18 640 obekt qamtyldy. Tekserý qorytyndysy boiynsha 17 588 zańǵa qaishy olqylyq anyqtaldy. Onyń ishinde josparly tekserý qorytyndysy boiynsha – 16 535, jospardan tys tekserý boiynsha – 1 053 olqylyq tabyldy», - dedi Nyǵmetjan Maqajanov OKQ brifinginde.
Onyń aitýnysha, kemshilik anyqtalǵan kásiporyndarda tekserý qorytyndysy boiynsha jedel den qoiý sharalaryn qabyldanyp, ákimshilik quqyq buzýshylyq týraly ister qozǵalǵan.
«Tekserý nátijeleri boiynsha 100 mln teńgeden astam somanyń 747 ákimshilik aiyppuly salyndy. Ónerkásiptik qaýipsizdik talaptaryn óreskel buzý arqyly adamdardyń ómiri men densaýlyǵyna qaýip tóndirgen 280 obekt anyqtalyp, onyń tórteýi jumysyn toqtatty. Esepti kezeńde qaýipti óndiristik obektilerde 14 avariia jáne 187 intsident tirkeldi. Qadaǵalaýdyń salalary men túrleri boiynsha avariialardyń basym bóligi kómir, metallýrgiia, munai-gaz, gaz sharýashylyǵy obektilerinde jáne kótergish qurylystardy paidalanatyn obektilerde boldy. Apat saldarynan barlyǵy 6 adam zardap shegip, onyń 1 adam qaitys boldy», - dedi komitet tóraǵasy.
