Elimizdiń óńdeý ónerkási salasynda oń dinamika qalyptasty. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Memleket basshysynyń Joldaýyna jáne «Nur Otan» partiiasynyń baǵdarlamasyna sáikes Úkimetke 2025 jyly óńdeý ónerkásibiniń óndirisin 1,5 ese arttyrý mindeti belgilendi. Salada oń dinamika qalyptasty. Ótken jyldyń qorytyndysy boiynsha ósý 3,9 paiyzdy qurady. Bul rette jalpy ishki ónim qurylymynda óńdeý ónerkásibiniń úlesi 12,7 paiyzǵa ósti», - dedi Úkimet basshysy.
Onyń dereginshe, Indýstriialandyrý kartasynyń aiasynda shamamen 1 trln teńgege 201 joba engizildi. 19 myńǵa jýyq turaqty jumys orny, onyń 7 myńnan astamy aýyldyq jerler men monoqalalarda quryldy. Óńdeý sektorynyń óndirýshilerine shamamen 300 mlrd teńgege memlekettik qoldaý sharalary kórsetildi. Bul óndiristiń, investitsiialar men eksport kóleminiń ósýine yqpal etti.
«Salanyń damýyna «qarapaiym zattar ekonomikasy» salalaryna jeńildikpen kredit berý mehanizmi oń áser etti. Onyń aiasynda búgingi tańda 700 mlrd teńgeden astam somaǵa shamamen 3 myńǵa jýyq joba qarjylandyryldy. Osy jumystyń barlyǵyn belsendi túrde jalǵastyrý kerek», - dedi Asqar Mamin.
Premer-Ministr «Ónerkásiptik saiasat týraly» Zań jobasy Parlament Májilisiniń qaraýyna engizilgenin, ol básekege qabiletti jáne joǵary tehnologiialyq ónerkásipti qalyptastyrýǵa baǵyttalǵanyn atap ótti.
«Indýstriia ministrligi ony ilgeriletýdi qamtamasyz etýi kerek», - dedi ol.
