Sońǵy 10 jyl ishinde el ekonomikasyn nesielendirý 1,8 ese, al tutynýshylyq nesie alý 7 esege ósti. Bul týraly Memleket basshysy Qasym-Jomart Toqaevtyń Qazaqstan halqyna Joldaýyna qatysty pikir bildirgen «Ekonomikalyq zertteýler institýty» AQ makroekonomikalyq zertteýler jáne boljamdaý ortalyǵynyń direktory Qýanysh Beisenǵazin aitty, dep habarlaidy QazAqparat.
«Ekonomikalyq kredit qurylymyndaǵy tutynýshylyq nesieniń úlesi 2010 jylǵy 8% bolsa, biyl bul kórsetkish 30%-ǵa jetti. Aldaǵy ýaqytta tutynýshylyq kreditterdiń sany artsa, onda ony óteý qiynǵa soǵady. Sebebi qazirgi tańda álemdik daǵdarys saldarynan halyqtyń tabysy tómendedi. Sondyqtan aqsha-kredit saiasaty jónindegi komitet qurý kredittik uiymdardyń jaýapkershiligin arttyrýǵa, sondai-aq nesieler boiynsha shekti mólsherlemelerdi esepteýge jáne tómendetýge yqpal etetin bolady», - dedi «Ekonomikalyq zertteýler institýty» AQ makroekonomikalyq zertteýler jáne boljamdaý ortalyǵynyń direktory Qýanysh Beisenǵazin.
Budan bólek, «Ekonomikalyq zertteýler institýtynyń» sarapshysy Strategiialyq josparlaý jáne reformalar jónindegi agenttik qurý bastamasy ýaqtyly qabyldanǵan sheshim ekenin atap ótti.
«Álemde bolyp jatqan daǵdarys Qazaqstan ekonomikasyna áser etpei qoimady. Sondyqtan Strategiialyq josparlaý jáne reformalar jónindegi agenttik qurý týraly sheshim búginde oryndy. Onyń negizgi fýnktsiiasy - álemdik tájiribeni zertteý, saraptama jasaý jáne strategiialyq qujattardyń iske asyrylýyn baqylaý. Atalǵan organ Prezidentke tikelei baǵynatyn bolady. Bul óz kezeginde mańyzdy sheshimderdi tez arada qabyldaýǵa jáne tiimdi jumys isteýge múmkindik beredi», - dedi «Ekonomikalyq zertteýler institýty» AQ tóraǵasynyń keńesshisi Perizat Omarova.
