Túrkistan oblysynyń ákimi Ómirzaq Shókeev Maqtaaral aýdanyndaǵy sý astynda qalǵan aýyldardyń halqymen kezdesip, olarǵa memlekettik komissiia sheshimin jetkizdi. Ýaqytsha ashylǵan ortalyqtarda azamattardyń turmystyq jaǵdailarymen tanysyp, muń-muqtajyn tyńdady, - dep habarlaidy Túrkistan oblysy ákiminiń baspasóz qyzmeti.
Saryaǵash aýdanynyń ákimdigine bekitilgen Igilik aýylyndaǵy orta mekteptegi evakýatsiialyq oshaqta Jańaturmys aýylynyń 200-den astam turǵyny ornalasqan. Barlyq evakýatsiialyq ortalyqtar azyq-túlik pen birinshi qajettiliktegi zattarmen tolyq qamtylǵan. Úsh mezgil ystyq tamaq beriledi. Munda meditsina jáne politsiia qyzmetkerleri táýlik boiy qyzmet etedi. Aýyl turǵyndary barsha qazaqstandyqtarǵa alǵystaryn bildirip, aqsaqaldar aq batalaryn berdi.
«Sý astynda qalǵan aýyldyń árbir turǵyny 100 myń teńgeden kómek alady. Myrzakent eldi mekeninde jańa yqsham aýdan soǵylady. Ol jerge Jeńis, Jańaturmys, Dostyq aýyldary tolyqtai kóshiriledi. Jańa qalashyqta ortalyqtandyrylǵan aýyz sý jáne gaz tartylyp, elektr jaryǵy, bailanys jelisi, joldar jasalatyn bolady. Jańa mektep, balabaqsha, iaǵni, áleýmettik nysandar salynady. Eń bastysy aýyzbirshiligimiz ajyramai, bar qiyndyqty el bolyp eńserýimiz qajet»,- dedi aýyl turǵyndarymen kezdesý barysynda Ómirzaq Shókeev.
Oblys basshysy Keles aýdanyna bekitilgen Ferdoýsi aýylynyń halqymen júzdesti. «40 jyldyq» aýylynda ornalasqan orta mektepte 530 turǵyn ýaqytsha meken tapty. Sýdan zardap shekken Órgebas jáne Firdoýsi halqyna tańdaý berildi. Olar ózge eldi mekennen boi kóteretin jańa móltekaýdanǵa kóshe alady. Memleket tarapynan óz úilerin qalpyna keltirýge ne árbir turǵyn úiin ózi salýǵa niet bildirse, oǵan ótemaqy tólenedi. Turǵyndar sheshimdi shuǵyl túrde ózara aýylaralyq jinalysta sheshetin boldy.
Budan bólek, turǵyndar apat aimaǵynda júrgiziletin qurylysqa shaqyryldy. Qurylys jumysyna qatysýshy azamattarǵa jalaqy tólenedi. Sondai-aq, Aýyl sharýashylyǵy taýar óndirýshileriniń shyǵyny tólenedi. Nesiesin tóleý ýaqyty keiinge shegeriledi. Al, joǵalǵan maldyń shyǵyny Tótenshe jaǵdai boiynsha Shtab janynan qurylǵan komissiia sheshimimen óteledi.
Oblys ákimi №5 mektep-gimnaziiasyna jaiǵastyrylǵan Jeńis eldi mekeni men sý basý qaýipi joǵary Nurlyjol aýylynyń halqymen kezdesti. Ortalyqqa jaýapkershilik Shardara aýdanynyń ákimdigine bekitilgen. Maqtaaral aýdanynyń aýmaǵyndaǵy 11 evakýatsiialaý ortalyqta 2404 adam ornalastyrylǵan.
Ómirzaq Shókeev Tótenshe jaǵdaiǵa qatysty ashylǵan arnaiy qoimada boldy. Syiymdylyǵy 2000 tonnaǵa eseptelgen qoimada 232 tonnadan astam azyq-túlik qory jinalǵan. Et, un, kúrish, mai jáne kiim-keshek pen kúndelikti qoldanysqa qajetti zattar Maqtaaral aýdanyndaǵy evakýatsiialyq ortalyqtarǵa jaiǵastyrylǵan turǵyndarǵa kúndelikti taratylýda. Munda syn saǵatynda qol ushyn sozǵan óńirdiń barlyq aýdandary men ózge oblystardan gýmanitarlyq kómekter jetkizilýde. Baqylaý «Nur Otan» partiiasy Túrkistan oblystyq filialy basshylyǵyna júktelgen.
