Búgin Túrkistan oblysynyń ákimi Ómirzaq Shókeev Ordabasy aýdany Bórjar eldi mekenindegi «Maqta kompaniiasy» JShS-na bardy, dep habarlaidy óńir basshysynyń baspasóz qyzmeti.
Ol munda jalpy oblystaǵy egis kólemimen, aýyl sharýashylyǵy salasyndaǵy jumystarmen tanysty. Sondai-aq, sharýalarmen kezdesip, usynystaryn tyńdady. Sonymen qatar, ákim egis alqabynda kombain júrgizip, bidai ordy.
Qazirgi tańda oblystaǵy bidai alqabynyń 44 paiyzy orylǵan. Iaǵni, 94 myń gektardan 183 myń tonna astyq jinalyp otyr. Jalpy 218 myń gektardyń ár gektarynan 21 tsentnerden ónim alǵanda 463 myń tonna bidai alý josparlanýda. Egin orýǵa qolda bar 1012 astyq kombainynyń 90-95% daiyndalyp, jinaý jumystaryna kirisken.
Astyqpen qatar, aýyl sharýashylyǵy daqyldarynan búgingi tańǵa 211,4 myń tonna kartop, 553,3 myń tonna kókónis, 592,4 myń tonna baqsha daqyldary jinalyp, ishki suranystan basqa Nur-Sultan, Almaty qalasy men basqa oblystarǵa jáne shetelge eksporttalýda. Jyl sońyna deiin 2,7 mln tonna kartop, kókónis, baqsha ónimderin jinaý josparlanyp otyr.
Egis alqabynda oblystyq aýyl sharýashylyǵy basqarmasynyń basshysy Nurbek Badyraqov óńirdiń saladaǵy jetistikterin málimdedi.
«Túrkistan oblysynda aǵymdaǵy jyly aýyl sharýashylyǵy daqyldarynyń egis kólemi 823 myń gektarǵa egildi. Bul 2018 jyldan 9,8 myń gektarǵa artyq. Sondai-aq, aýyl sharýashylyǵy daqyldaryn ártaraptandyrýǵa sáikes arpa – 1,8 myń gektarǵa kóbeiip, 40 myń ga, dándik júgeri – 2,2 myń gektarǵa, 46 myń ga, kartop, kókónis, baqsha daqyldary – 5,9 myń gektarǵa, 119,8 myń ga, mal azyqtyq 15,9 myń gektarǵa artyp, 205,8 myń gektardy qurap otyr. Al bidaidyń egis kólemi biyl 218 myń gektarǵa jetse, maily daqyldar – 96,8 myń ga, maqta – 129 myń ga egildi. Aldyn ala jasalynǵan boljamdyq esep boiynsha 218,6 myń ga masaqty daqyldardyń ár gektarynan ortasha 21,2 tsentnerden jalpy 462 myń tonna ónim alý kútilýde», – dedi Nurbek Baqtybaiuly.
Oblys ákimi Ómirzaq Estaiuly sala basshylaryna jaz mezgilinde aǵyn sý máselesin qadaǵalap, sharýalardyń jaǵdaiyn baqylaýda ustaý qajettigin tapsyrdy. Sondai-aq, aýyl sharýashyǵy ónimderin eksporttaý kólemin udaiy arttyryp otyrýdy júktedi.
