Túrkistan oblysynyń ákimi Ómirzaq Shókeev Maqtaaral aýdanyna baryp, halyqpen kezekti kezdesýin ótkizdi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Ashyq ári erkin formatta ótken júzdesýde myrzashóldikter kókeide júrgen saýaldaryn qoiyp, ózekti máselelerdi qozǵady. Oblys ákimi Maqtaaral aýdanyn damytý nazarda turǵanyn aita kele atqarylǵan jumystardy baiandady.
«Búgin ózderińizben taǵy da júzdesip turmyz. Basty maqsat – eldiń ózekti máselelerin talqylaý, sheshý jolyn josparlaý. Jalpy Maqtaaral aýdanynyń máseleleri maǵan óte tanys. Sondyqtan tiisti kóńil bólinip keledi. Sý tasqyny bolǵan kezde aýdanǵa 5 aida 35 ret kelippin. Órgebas, Firdaýsi aýyldary jańaryp, Myrzakentte jańa shaǵynaýdan paida boldy. Maqtaaraldy jańadan qurylǵan dep aitýǵa bolady. Qazirgi tańda aimaq óz deńgeiinde damyp keledi. Biyl diqandar erte pisetin kókónisten jaqsy ónim jinady. Baqshanyń da maýsymy aiaqtalyp jatyr. Aýdanda gazdandyrý jumystary jalǵasýda. 5-6 jyl buryn oblystaǵy keibir aýdan, qalalarǵa gaz joq edi. Qazir oblystyń 60 paiyzy gazdandyryldy. Túrkistan qalasynda gazben qamtý eselep artyp, tolyq qamtyldy. 2013 jyldan beri qubyrlar salynǵanymen gaz taratýshy iri kompaniialarmen túsinispeýshilik bolyp, gazdandyrý saiabyrsyp turǵan. Bul máseleni arnaiy jetkizgen soń Prezidentimiz Qasym-Jomart Toqaev tapsyrma berip, gaz taratý isi jandandy. 2025 jylǵa deiin óńirdiń 70 paiyz gazben qamtylýy tiis. Biyl Maqtaaral aýdanynda halyqty tabiǵi gazben qamtamasyz etý úshin 9 nysannyń qurylysyna qarjy bólinip, jumys júrip jatyr. Osy jyly el igiligine beriledi. Kezdesýde aitylǵan sózder jerde qalmaidy. Tiisti hattama túzilip, nazarǵa alynady», – dedi Ómirzaq Shókeev.
Kezdesýde maqtaaraldyq kópbalaly ana AÁK alatyn otbasylardyń balalaryna mektep formasyn alý máselesin kóterdi. Óńir basshysy bul másele shuǵyl zerdelenip, oblystyq biýdjetten 1,9 mlrd. teńge qaralyp, 52 myńnan astam oqýshyǵa mektep formasy áperilip jatqanyn málimdedi. Sondai-aq Qońyrat kóshesin jóndeý, kópir salý, óndiristik-tehnikalyq kombinatqa qoldaý kórsetý máseleleri de sheshiletin boldy. Oblys ákiminiń jeke qabyldaýynda da birneshe turǵynnyń ótinishi tyńdalyp, tiisti basshylarǵa tapsyrmalar berildi.
Júzdesý barysynda maqtaaraldyqtar Myrzakentte jańa shaǵynaýdannyń boi kóterýine qairat kórsete bilgen, aýdannyń damýyna atsalysyp júrgen aimaq basshysyna alǵystaryn bildirdi.
Oblys ákiminiń maqtaaraldyqtarmen sáýir aiyndaǵy kezdesýinen keiin birqatar másele sheshimin tapqan. Atap aitsaq, Atakent kentindegi tik drenajdar uńǵymalarynyń eski nasostary qýattylyǵy joǵary jańa nasostarǵa aýystyryldy. Igilik aýylynda dárigerlik ambýlatoriianyń qurylysy bastalǵan. Biyl tapsyrylady. Iirjar aýyldyq okrýgi, Alash eldi mekeniniń gaz qubyrlarynyń qurylysy qarqyn aldy. Iirjar eldi mekeniniń aýyz sý qubyryn qaita qurý jumystary júrgizilýde. El usynysyna orai Órkeniet eldi mekeninde 200 oryndyq tiptik úlgidegi mekteptiń qurylys montaj jumystary bastalǵan. Aýdan aýmaǵynda 60,96 myń gektar jerge aýyl sharýashylyǵy daqyldary egilip, bul sala da damyp keledi.
Biyl Maqtaaral aýdanynda jalpy quny 5,1 mlrd. teńge quraityn 6 mekteptiń qurylysy júrgizilýde. Nysandar 2023 jylǵa ótpeli. Sonymen qatar Myrzakent kentinde aýdandyq ákimshilik ǵimaraty salynyp jatyr. Aýdannyń injenerlik infraqurylym júiesin damytý maqsatynda respýblikalyq biýdjetten 402,2 mln. teńge qarjy qaralyp, J.Nurlybaev jáne Jambyl aýyldyq okrýgi eldi mekenderiniń jańadan túsken kóshelerine elektr jelilerin júrgizý jáne KTP ornatý jumystary bastalǵan. «Aýyl – El besigi» jobasy aiasynda 9 eldi mekende 28 joba iske asyrylyp jatyr.
Jumys sapary barysynda Maqtaaral aýdanynyń ákimi Baqyt Asanov óńir basshysyn aýdannyń ózekti máselelerimen tanystyrdy. Olardyń sheshý joldaryn talqylap, jańadan qolǵa alynatyn jobalarǵa toqtaldy.
Ómirzaq Shókeev Abat aýylyndaǵy jańa oqý jyly ashylatyn J.Nurlybaev atyndaǵy №49 jalpy orta mektebiniń 300 oryndyq jańa ǵimaratynda boldy.
