Kentaý qalasy ákiminiń eseptik kezdesýine qatysqan oblys ákimi Ómirzaq Shókeev oblys ortalyǵy Túrkistanmen birge Kentaý qalasy da qatar damityndyǵyn atap ótti, dep habarlaidy oblystyq ákimdiktiń baspasóz qyzmeti.
«Ákimderdiń el aldynda esep berýi kezinde Elbasy Nursultan Nazarbaevtyń Jarlyǵymen engizilip, qalyptasqan dástúrge ainaldy. Memleket basshysy Qasym-Jomart Toqaev bul dástúrge úlken mańyz berip, jańasha ótkizý úshin ózgerister engizdi. Ózderińiz kórip júrgendei, jańashyldyq qarqyny jaqsy. Búgingi kezdesý sonyń bir dáleli. Kentaý 65 jyldyq tarihy bar qala. Kezinde óndiris órkendegen óńir bolǵan shahar eldegi daǵdarys saldarynan birshama qiyndyqtardy bastan ótkerdi. Qazir jaǵdai turaqtanyp, Kentaýdyń jańa dáýiri bastaldy. Qala ákimine úlken jaýapkershilik artyp, senim bildirip otyrmyz. Ózine júktelgen mindetterdi júzege asyrýda josparlary bar. Ásirese, áleýmettik salaǵa basty baǵyt berýi kerek. Sondai-aq, Kentaýda aýyl sharýashylyǵy jaqsy damyp keledi. Shet eldiń tájiribesine súienip, bul salada da kóptegen jumystar atqarýǵa bolady», – dedi Ómirzaq Estaiuly.
Shahar basshysy Dáýren Mahajanov áleýmettik-ekonomikalyq damýy aiasynda atqarylǵan jumystardy baiandady.
«Byltyr qala biýdjeti kiris bóligin 40 mlrd. teńgege oryndadyq. Mundai kórsetkish qala tarihynda buryn sońdy bolǵan emes. Qala ekonomikasyna tartylǵan investitsiia kólemi 24,4 mlrd. teńgege jetken. Indýstrialdy aimaqta 2,9 mlrd. teńgege 10 jobany iske iske qosý josparlanǵan. Aýyl sharýashylyǵy salasyndaǵy basty baǵyt – azyq-túlik beldeýin quryp, jylyna 3 ret ónim jinaýdy júzege asyrý. Bul salaǵa investitsiia men ozyq tehnologiialardy tartý. Osyǵan orai aýyl sharýashylyǵy kooperativterine biriktirý jumystaryn jasaýdamyz», – dedi qala basshysy óz baiandamasynda.
Kentaý qalasyn tabiǵi gazben qamtamasyz etý jumystary qarqyndy júrýde. Tozyǵy jetken 300 kópqabatty turǵyn úidi tolyq jóndeýden ótkizip, jańartý kózdelgen. Joldar jóndelip, kósheler tolyq jaryqtandyrylýda. Eki kópqabatty turǵyn úi paidalanýǵa berilip, 10 úidiń qurylysy júrip jatyr. Aldaǵy ýaqytta munda tennis korty, basketbol, voleibol, fýtbol alańshalary ornalasyp, velojol salynbaq. Kentaýda aýysymyna 500 kelýshini qabyldaityn jańa emhana boi kóterdi. Munda emhana men «Jedel járdem» stansasy ornalasatyn bolady.
Kezdesýde turǵyndardyń suraqtaryna qala ákimi keń kólemde jaýap berdi. Jiyndy qorytyndylaǵan Ómirzaq Estaiuly kópshilikti igi isterdiń júzege asýyna qoldaý kórsetýge shaqyrdy.
Eseptik kezdesýden soń oblys ákimi jańadan salynyp jatqan úilerdiń qurylysy men qalanyń jylý júiesine engizilgen jańa jobamen tanysty. Alda Kentaý qalasy tolyq avtonomdyq jylý júiesine kóshedi. Turǵyndar tarapynan qoldaýǵa ie bolǵan bastamaǵa oblys ákimi oń baǵasyn berdi.
