Búgin Túrkistan oblysynda ótken Aza tutý sharasyna qatysqan óńir basshysy Ómirzaq Shókeev koronavirýs infektsiiasynan qaitys bolǵandardyń otbasylaryna kóńil aitty. Aimaq basshysy óz sózinde óńirdegi Covid-19 indetiniń aldyn alý, saqtaný, shekteý jáne naýqastardy emdeý sharalary qolǵa alynǵanyn atap ótti, dep habarlaidy "Ult aqparat".
Ómirzaq Shókeev naýqastardy emdeý, saýyqtyrý mekemelerinde tósek-oryndar men dári-dármek qory jetkilikti ekenin jetkizdi. Oblys turǵyndaryn qoǵamdyq oryndarda áleýmettik araqashyqtyqty saqtap, shekteý sharalaryn meilinshe ustanýǵa shaqyrdy.
«Qurmetti túrkistandyqtar! Qadirmendi jerlester! 2020 jylǵy 13 shildeni el Prezidenti Qasym-Jomart Toqaev koronavirýstyq infektsiiadan qaza tapqandardy eske alý – Ulttyq aza tutý kúni dep jariialady. Biylǵy jylǵy koronavirýstyq infektsiia álem boiynsha alapat shyǵyn ákeldi. Atalǵan derttiń salqyny elimizdi de ainalyp ótken joq. Sońǵy eki-úsh aida qanshama otandastarymyz ben jerlesterimiz osy dertten kóz jumyp, qabyrǵamyzdy qaiystyryp ketti. Bizdiń memleketimiz úshin árbir adamnyń ómiri qymbat. Desek te, aty jaman indetten qanshama otbasy qara jamylyp, ul-qyzdary, týǵan-týystary qaiǵy-qasiretke dýshar boldy. Osy rette mezgilsiz dúnieden ótken marqumdardyń týǵan-týystary men jaqyndaryna qaiǵylaryna ortaqtasyp, kóńil aitamyn. Qazaqta «Tas túsken jerine - aýyr» degen sóz bar, endeshe bekem bolyńyzdar! Men Sizderdiń qaiǵylaryńyzǵa ortaqpyn», - dedi Ómirzaq Estaiuly.
