Túrkistan oblysynyń ákimi Ómirzaq Shókeev «Bórte» spektakli týraly jýrnalister suraǵyna jaýap berdi, dep habarlaidy QazAqparat.
Ortalyq kommýnikatsiialar qyzmetinde ákimge «Bórte» spektakline 246 mln teńgeniń bólinýi tym qymbat dep oilamaisyz ba? Basqa qalalarda osyndai qoiylymdarǵa 3-4 mln teńge ketedi» - degen suraq qoiyldy.
«Joq, olai oilamaimyn. Biz barlyq smetany tekserip shyqtyq, onda artyq eshteńe qarastyrylmaǵan. Jáne onyń jańa teatr ekenin eskersek, dekoratsiia kerek, kostiýmdar kerek, avtorlar men rejisserdiń gonoraryn, akterlerdiń eńbekaqysyn tóleý kerek – tekserý jumystary kórsetkendei, barlyq qarajat ornymen jumsalǵan. Kerisinshe, men Túrkistanǵa kelgeni úshin teatr ujymyna alǵys aitqym keledi. Olardyń barlyǵy túrli elderdiń astanasynda eńbek etken, alǵashqy qoiylymynyń ózin joǵary deńgeide kórsetti. Teatr qalanyń basty ornyna ainaldy, teatr qoiylymy úshin Nur-Sultan men Almatydan arnaiy ushyp keletin qonaqtar bar. Al 3-4 million teńgege qandai spektakl qoiýǵa bolatynyn elestete almaimyn», - dep jaýap berdi Ó. Shókeev.
Óńir ákimi jetekshi teatrlar úshin 200 mln teńgeden astam qarajat kóptik etpeitinin aitty.
«Keshe de birneshe sait Túrkistan teatrynyń elordaǵa gastroline 32 mln teńge bólinetinin jazdy. Bul suraqty men de qarastyryp kórdim. Bul teatrǵa úlken suranys boldy, elorda ákimdiginiń ózi usynys jasady. Nur-Sultandaǵy teatrdy bir kúnge jalǵa alýdyń ózi – 8 mln teńge. Eki kún qoiylym kórsetýge 16 mln teńge ketedi. Qalǵany teatrdy astanaǵa ákelý, dekoratsiialardy tasymaldaý, issaparlar men qonaqúilerge jumsalady. Jalpy alǵanda bul tsifrlar aqylǵa qonymdy. Eger qandai da bir buzýshylyqtar bolsa, ony tekseretin tiisti organdar bar. Al negizi obektivti túrde qaraý kerek jáne Túrkistandy rýhani astana etýge janyn salyp júrgenderdiń eńbegin qurmetteý kerek», - dedi Ó. Shókeev.
Aita keetiik, 9-10 qazan kúnderi Túrkistan mýzykalyq drama teatry belgili dramatýrg, QR Memlekettik syilyǵynyń laýreaty Dýlat Isabekovtiń pesasyna qoiylǵan «Bórte» spektaklimen ashyldy jáne anshlagpen ótti.
20-21 qarasha kúnderi «Bórte» spektakli Nur-Sultan qalasynda Q. Qýanyshbaev atyndaǵy memlekettik akademiialyq qazaq mýzykalyq drama teatrynda kórsetiledi.
