QR Premer-ministriniń orynbasary - Aýyl sharýashylyǵy ministri Ómirzaq Shókeev 2018 jyl aýyl sharýashylyǵy úshin berekeli ári tabysty jyl bolǵanyn aityp berdi, dep habarlaidy QazAqparat tilshisi.
«Biylǵy jyl aýyl sharýashylyǵy salasyna óte tabysty boldy. Kóptegen júieli máseleler sheshildi. Eń bastysy biz Úkimetpen jáne Parlamentpen birlesip, jańa baǵdarlamalardy qabyldadyq. Jarty jyldyń ózinde birshama nátijege qol jetkizildi. Mal sharýashylyǵynda, et óndirýde, eksportqa shyǵarýda, eńbek ónimdiligin ósirý joldaryn tsifrlandyrýda kóptegen sharýa atqaryldy», - dedi Ómirzaq Shókeev Úkimet otyrysynan keiin tilshilerdiń suraǵyna jaýap bere otyryp.
Ómirzaq Shókeev óz sózin naqty kórsetkishtermen shegelei tústi.
«Jyl óte berekeli, astyqty boldy. 22,8 mln tonna astyq jinaldy. Eksport byltyrǵyǵa qaraǵanda 34 paiyzǵa ulǵaidy. Et eksportyn, ótken jyly ýáde bergendei, 5 myń tonnadan 18 myń tonnaǵa jetkizdik. Kelesi jyly 30 myń tonnaǵa jetkizemiz dep otyrmyz. Sondyqtan, osy jyl aýyl sharýashylyǵy salasyna óte berekeli ári tabysty jyl boldy dep oilaimyz», - dedi ol.
Qyzmetińizde ne qiyndyq kezdesti degen suraqqa Ómirzaq Shókeev «úirengen qyzmet qoi» dep jaýap berdi.
Eske sala ketsek, Úkimet basshysy Baqytjan Saǵyntaev jyldy qorytyndylap, Memleket basshysynyń tapsyrmasyn oryndaýda belsendi jumys júrgizgen áriptesteriniń bárine alǵys aitqan bolatyn. Premer-ministrdiń aitýynsha, Elbasy mindettegen barlyq mindetterdi abyroimen oryndaý úshin Úkimet músheleri bar kúsh-jigerin salǵan.
