Kollaj: ulysmedia.kz
Atyraý oblysynyń Qyzylqoǵa aýdany Miialy aýylynyń jurty keshe áskerde qaza bolǵan 18 jastaǵy Bekbol Dosbolulynyń denesin jer qoinyna tapsyrdy, dep habarlaidy Ulysmedia.kz.
Sarbazdyń ólgeni týraly alǵash aqparatty qoǵam belsendisi Bibigúl Ramazan Facebook-tegi paraqshasynda jazǵan. Avtordyń jazýynsha, oqiǵa 19 tamyz kúni bolǵan. 2004 jyly týǵan sarbaz óz-ózine qol jumsaǵan.
«Jambylda atyraýlyq sarbaz qaitys boldy degen qaraly habar jetti. 2004 jyly týǵan Mirash Bekbol Dosboluly Atyraý oblysy Qyzylqoǵa aýdany Miialy aýylynyń týmasy», - dep jazdy qoǵam belsendisi.
Degenmen sarbazdyń ólimine qatysty resmi aqparat jariialanǵan joq. Tek sarbazdy aqtyq saparǵa shyǵaryp salar kezde onymen birge áskeri qyzmette bolǵan sarbazdar Miialy aýylyna kelgen eken. Sol kezde «sarbazdyń qyzymen ursysyp qalyp osyndai qadamǵa barǵany» týraly aitylǵan bolýy kerek. Alaida sarbazben sol aýyldaǵy qyzy bul aqparatty joqqa shyǵardy. Ol videoda Bekboldyń hatyn jariialady.
«Bárinen qorqyp júrmin. Kóringen adamnan qorqyp júrmin. Adamnan qoryqpaityn edim. Qanshama dostarym bar edi. Bári qaldy. Sen de janymda emessiń. Meniń ómirden joq bolyp ketkim keledi. Vnatýre túńilip kettim. Mynandai qorqynysh sezim ótkenshe ólgenim artyq qoi. Men seni jaqsy kórem», - dep jazyp ketken Bekbol.
«Biz ursysyp qalsaq, osyndai sózderdi aita ma? Aitpaidy» dep dálel keltiredi boijetken.
Al sarbazdyń aǵalarynyń biri kóz jumar aldynda Bekbol «jarty saǵattyń ishinde 28-30 myń teńge taýyp bershi» dep jalynǵanyn aitady.
QR Ulttyq qaýipsizdik komiteti Shekara qyzmetiniń resmi saitynda Bekboldyń ólimi týraly aqparat joq. Alaida resmi sait 19 tamyzda Atyraý oblysynda Memlekettik shekara ýchaskeleriniń birinde qyzmetin ótkerip júrgen Shekara qyzmetiniń áskeri qyzmetshisi Erǵaliev Nurbek qaitys bolǵany týraly málimet bergen.
UQK Shekara qyzmetin Qazaqstan Respýblikasy UQK tóraǵasynyń orynbasary – Shekara qyzmetiniń direktory, general-maior Erlan Aldajumanov basqarady. Shekara qyzmeti memlekettik shekaranyń tutastyǵyn jáne qol suǵylmaýshylyǵyn qamtamasyz etý, shekara keńistiginde zańdylyq pen belgilengen tártipti saqtaý maqsatynda qurlyqta, aýmaqtyq sýlarda (teńizde) jáne ishki sýlarda (onyń ishinde sýasty ortasynda) Qazaqstan Respýblikasynyń Memlekettik shekarasyn qorǵaýdy jáne kúzetýdi júzege asyratyn Qazaqstan Respýblikasy Ulttyq qaýipsizdik komitetiniń vedomstvosy bolyp tabylady.
