«Respýblika» partiiasynyń lideri Ómirbek Babanov 9 tamyzda Bishkekke ushyp keldi. Bul týraly "Manas" áýejaiynda júrgen Azattyqtyń Qyrǵyz qyzmeti habarlady.
8 tamyzda "Respýblika" partiiasy málimdeme jasap, eldiń qazirgi prezidenti Sooronbai Jeenbekov pen eks-prezident Almazbek Atambaevty "máseleni beibit ári zań jolymen, kelissózben sheshýge" shaqyrǵan.
Babanov 2017 jyly prezident sailaýyna túsip, Jeenbekovten jeńilgen. Keiin ol saiasi karerasynyń aiaqtalǵanyn aityp, elden ketken. Ol Máskeýde bolǵan.
8 tamyzda Qyrǵyzstan memlekettik ulttyq qaýipsizdik komiteti Babanov elge oralǵan jaǵdaida jaýapqa tartylatynyn málimdegen. Komitet Babanovqa qatysty "konstitýtsiialyq qurylymdy kúshpen ózgertýge shaqyrý" jáne "ultaralyq, násildik jáne dini arazdyq qozdyrý" baby boiynsha eki qylmystyq is tergelip jatqanyn da habarlady.
8 tamyzda Qyrǵyzstannyń kúshtik qurylymdary Koi-Tashta júrgizgen ekinshi operatsiiadan keiin eldiń burynǵy prezidenti Almazbek Atambaevty ustady.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitady.
