Bas prokýratýra asa aýyr qylmystar úshin jazany kúsheitýge arnalǵan jospardy jariialady, dep habarlaidy Sputnik Qazaqstan.
Bas prokýrordyń orynbasary Marat Ahmetjanovtyń aitýynsha, búginde arnaiy zań jobasy ázirlendi. Osy qujatta asa aýyr qylmystar úshin jazany kúsheitýge qatysty naqty ózgerister men tolyqtyrýlar bar.
"Máselen, seksýaldy sipattaǵy zorlaý faktileri aýyr qylmystardyń sanatyna engiziletin bolady. Balalarǵa qatysty seksýaldyq sipattaǵy barlyq qylmystar úshin jaza kúsheitiledi. Al jas balaǵa qatysty zorlaý áreketi úshin ómir baqi bas bostandyǵynan aiyrý nemese 20 jyldan kem emes ýaqytqa bas bostandyǵynan aiyrý jazasy bolady", - dedi Ahmetjanov astanada ótken baspasóz máslihatynda.
Onyń aitýynsha, búgingi zańnamada sybailas jemqorlyq jáne terrorizm áreketi týraly habar bermegeni úshin jaýapkershilik qarastyrylǵan. Endi, kámelettik jasqa tolmaǵan balany zorlaý faktisin jasyrý jáne pedofiliianyń aýyr faktileri týraly habar bermeý úshin jaza bolady. Ony aýyr qylmystar sanatyna qosady.
"Ondai zań buzýshylyqtar úshin 6 jylǵa deiin bas bostandyǵynan aiyrý josparlanyp otyr. Bul degenimiz, balalarǵa arnalǵan mekemelerdiń basshylary jáne qyzmetkerleri balany zorlaý faktisin jasyrsa, jaýapqa tartylady. Týra sondai jaza balanyń ata-anasyna jáne asyraýshysyna da qoldanylady", - dedi Ahmetjanov.
