Omikron shtammy Qazaqstan aýmaǵyna erteli-kesh jetedi. Bul týraly QR Densaýlyq saqtaý ministrligi Sanitarlyq-epidemiologiialyq baqylaý komitetiniń tóraǵasy Aijan Esmaǵambetova aitty, dep habarlaidy QazAqparat agenttigi.
«Búginde Omikron álemniń 60-qa jýyq elinde tirkelgen. Munyń ózi 1 aidyń ishinde oryn aldy. Bul degenińiz, Omikronnyń óte jyldam taraityndyǵyn bildiredi. Ózge shtammdardy mysalǵa ala otyryp, Omikronnyń Qazaqstanǵa tasymaldanýy tek ýaqyt enshisinde ekendigin aitýǵa bolady. Bul shtammnyń elimizge tasymaldanýynyń aldyn alý úshin qabyldanyp jatqan is-sharalar arqyly sol ýaqytty uzaqqa sozýǵa tyrysyp jatyrmyz», - dedi komitet tóraǵasy «BaigeNews» Youtube arnasynda ótken suhbat barysynda.
Onyń atap ótýinshe, qazirgi ýaqytta koronavirýstyń jańa shtammy - Omikronǵa qatysty ǵylymi negizde dáleldengen senimdi málimetter joq.
«Oǵan klinikalyq, epidemiologiialyq málimetter, ony emdeýdiń ári aldyn alýdyń túrli ádisteriniń tiimdiligi týraly aqparattar jatady. Al biz úshin bul ýaqyt shtammnyń ózgeriske ushyraǵanyna ne ushyramaǵandyǵyna qatysty málimetterdiń paida bolýy úshin qajet. Ol kei naýqasta aýyr nemese jeńil ótedi. Keide óte qaýipti, tipti aýyr jaǵdailarǵa dýshar qylyp, ólim-jitimge de alyp keledi», - dedi Aijan Esmaǵambetova.
