Nur-Sultanda Qazaqstan Respýblikasyndaǵy Adam quqyqtary jónindegi ýákil Elvira Ázimova Qazaqstanǵa resmi saparmen kelgen Eýropalyq Parlamenttiń Adam quqyqtary jónindegi kishi komitetiniń bir top depýtatymen kezdesti, dep habarlaidy "Ult aqparat".
Ombýdsmenniń shaqyrýymen bul kezdesýge «qańtar oqiǵalary» kezinde jabyq mekemelerdegi jaǵdaiǵa monitoring júrgizgen ulttyq aldyn alý tetiginiń (UAT) qatysýshylary da onlain qatysty. UAT qatysýshylary tótenshe jaǵdai kezinde azamattyq qoǵam ókilderiniń arnaiy mekemelerge kedergisiz kirýi jáne der kezinde jedel den qoiýy adam quqyqtaryn buzýdyń aldyn alýda aitarlyqtai mańyzdy ekenin atap ótti.
Kezdesýge qatysýshylardyń aitýynsha, saiasi jańǵyrý kezeńiniń aldynda turǵan bizdiń elimiz úshin azamattyq qoǵam institýtynyń ókilderin quqyq ústemdigi jáne adam quqyqtaryn qorǵaýda jańartý protsesine belsendi tartý qajet. Osy oraida ozyq halyqaralyq tájiribeler men qabyldanǵan mindettemelerdi eskere otyryp, olardyń sapaly jáne jan-jaqty saraptamalyq belsendiligi mańyzdy bolmaq.
«Osy turǵyda kúsh-jigerimizdi jáne árbir tulǵanyń quzyrettiligin biriktirý arqyly uzaq merzimdi nátijege qol jetkizýge bolady. Bizdiń kezdesýlerimiz problemalyq aimaqtardy anyqtap qana qoimai, osyndai jiyndar azamattardyń quqyqtaryn qorǵaý máselelerin júieli túrde sheshýge septigin tigizýi tiis dep oilaimyn», – dep túiindedi E.Ázimova.
Kezdesý qorytyndysy boiynsha qatysýshylar adam quqyqtary salasyndaǵy birqatar máseleler boiynsha dialogty jalǵastyrýǵa kelisti.
#Ombudsman #Ýákil #AdamQuqyǵy
