Aýyl sharýashylyǵy ministri Saparhan Omarov jer qatynastaryn tsifrlandyrý jumystary qalai júrgizilip jatqanyn aityp berdi, dep habarlaidy QazAqparat.
«Agroónerkásip keshenin tsifrlandyrýǵa qatysty bizde jospar kóp. Alaida, bul rette, men negizgi úsh máseleni atap óteiin. Birinshiden, jer qatynastaryn tsifrlandyrý boiynsha qazirgi ýaqytta QR Tsifrlyq damý, innovatsiialar jáne aeroǵarysh ónerkásibi ministrligimen birge tiisti zań jobasy ázirlenip, oǵan sáikes jer aýmaqtarynyń bári de tsifrlandyrylady. Jalpy qazir aýyl sharýashylyǵy jerleriniń barlyǵy da tsifrlandyrylyp qoiǵanyn atap ótý kerek. Endigi kezekte jerdiń basqa túrlerin osy ádispen tsifrlandyramyz. Zań jobasy qabyldanǵannan keiin jerdiń bári elektrondy formatta beriledi», - dedi Saparhan Omarov Úkimettiń baspasóz ortalyǵynda ótken brifingide.
Ministrdiń aitýynsha, eń aldymen, adam faktory men biýrokratiiany joiyp, jer boiynsha túsken ótinimderdi qaraý merzimin qysqartýǵa mańyz beriledi.
«Ekinshi másele – aýyl sharýashylyǵy ónimderin baqylaý. Qazir IT-kompaniialardyń birimen oǵan qatysty joba ázirlenýde. Úshinshiden, aýyl sharýashylyǵy ónimderiniń elektrondy saýdasyna basymdyq beriledi», - dedi ol.
