Qyzylorda oblysyna jumys sapary barysynda Cybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov qalalyq memlekettik mekemelerdiń qaita qurylǵan qyzmetimen tanysyp, biznes-qoǵamdastyqpen jáne azamattarmen kezdesti. Bul týraly atalmysh vedomostvonyń baspasóz qyzmeti habarlady.
Oljas Bektenov aldymen memlekettik mekemeler usynatyn qyzmettiń sapasymen tanysý maqsatynda «open space» formatynda salynǵan «Bizneske arnalǵan úkimet» memlekettik korporatsiiasy» KE AQ Qyzylorda oblysy boiynsha filialyna bardy.
Qazirgi tańda, mekeme qyzmetkerleri kásipkerler men investorlarǵa 18 baǵytta 90 qyzmet túri boiynsha tegin qyzmet kórsetedi (kórsetiletin 90 qyzmet túriniń 46-sy memlekettik qyzmet, 21-i elektrondyq memlekettik qyzmet).
Kásipkerlerdi qoldaýǵa arnalǵan «Bizneske arnalǵan úkimet» biryńǵai servis ortalyǵy «bir tereze» qaǵidasyna negizindelgen. 2020 jyldyń qorytyndysy boiynsha oblys kásipkerlerine 13 488 qyzmet kórsetilgen.
Budan bólek, bul ǵimaratta oblystyq kásipkerlik jáne týrizm basqarmasy, «Atameken» ulttyq kásipkerlik palatasynyń Qyzylorda oblysy boiynsha filialy, «Azamattarǵa arnalǵan úkimet» memlekettik korporatsiiasy» KE AQ, «Aimaqtyq investitsiialyq ortalyq «MQU» JShS, «Halyq Banki» AQ, «VTB» AQ-nyń filialdary men bólimsheleri, AMANAT HOME kooperativi ornalasqan.
Shara barysynda Bektenov «Qazirgi tańda kásipkerlerdiń quqyqtary men zańdy múddelerin qorǵaý – eldiń kún tártibindegi basym baǵyttarynyń biri. Memleket basshysy óziniń jyl saiynǵy joldaýynda atap ótkendei, pandemiia kezeńinde shaǵyn jáne orta biznes qiyn jaǵdaiǵa tap bolǵandyqtan, qoldaýǵa asa muqtaj. Osy rette, bizneske zańsyz aralasý, onyń qyzmetine kedergi keltirý «memleketke qarsy eń aýyr qylmys» retinde qabyldanýy tiis», - dep atap ótti.
Osy rette kásipkerler men investorlardy sybailas jemqorlyqqa qarsy súiemeldeitin «Protecting business and investments» jobasyn atap ótken jón.
Qazirgi tańda Agenttik jalpy somasy 16,3 trln teńgeniń 656 biznes-jobasyn sybailas jemqorlyqqa qarsy súiemeldeidi, onyń ishinde Qyzylorda oblysynda 554 mlrd teńgeden astam somaǵa 22 biznes joba qorǵaýǵa alynǵan.
Shara sońynda Agenttik tóraǵasynyń birinshi orynbasary atalǵan joba aiasynda súiemeldeýge alynǵan kásipkerlermen kezdesip, oblystaǵy kásipkerliktiń jai-kúii jaily máselelerdi talqylady.
