Foto: pm.kz
28-tamyzda Frantsiia astanasy Parij qalasynda XVII jazǵy paralimpiada oiyndary bastalady. Búgin Astanada QR Premer-ministri Oljas Bektenov paralimpiada ulttyq quramasynyń múshelerine Memlekettik Týdy tabystady.
Tórtkúl dúnie kóz tikken Parijdegi dodada Qazaqstan týyn paralimpiadadan Aziia oiyndarynyń júldegeri, (voleiboldy otyryp oinaýdan) Qazaqstannyń on dúrkin chempiony Berik Izmaǵanbeotv pen para oq atýdan chempion Sevda Alieva alyp shyǵady.
Saltanatty jiyn barysynda Oljas Bektenov sportshylarǵa ystyq yqylasyn bildirip, sáttilik tiledi.
"Paralimpiada tek sport emes, bul adamnyń sheksiz qabiletteriniń dáleli. Sizderdiń erik-jigerlerińiz ben batyldyqtaryńyz tańdanýǵa turarlyq. Milliondaǵan adamdar sizderdiń janqiiarlyqtaryńyz ben myzǵymas rýhtaryńyzdan shabyt alady, ómirdegi kedergilerdi jeńýdi úirenedi. Búgin sizderge tabystalatyn tý – birlik pen jeńistiń simvoly. Memleket basshysy álemniń basty sport jarystarynda eldiń ar-namysyn qorǵaý-qurmetti mindet, zor abyroi men jaýapkershilik ekenin atap ótti. Sizder Qazaqstandy halyqaralyq arenada laiyqty tanystyryp, jeńis tuǵyrynan kórinetinderińizge senimdimiz", - dep atap ótti Premer-ministr.
Biylǵy dodada ulttyq qurama para júrý, para paýerlifting, para jeńil atletika, para kanoe, para thekvondo, otyryp voleibol oinaý, para oq atý, para ústel tennisi jáne para dziýdoda baq synaidy.
Sportshylar ózderine júktelgen jaýapkershilik pen mindettelgen missiiany adal atqarýǵa sóz berdi.
"Búgingi kún men úshin óte mańyzdy. Osyndai deńgeidegi jarystarda elimizdiń Týyn kóterý – úlken jaýapkershilik. Ár sportshy Paralimpiada oiyndaryna qatysýdy armandaidy. Qazaqstannyń namysyn laiyqty qorǵaý úshin bar kúshimizdi salamyz. Bizdiń júregimizde Otanǵa degen súiispenshilik pen jeńiske degen erekshe umtylys bar", - dedi Berik Izmaǵanbetov.
Paralimpiada oiyndaryna baratyn sportshylar sany jyl sanap artyp keledi. Máselen, Tokiodaǵy tartysqa Qazaqstannan 26 sportshy qatysqan bolsa, biyl bási biik báigege sporttyń 9 túrinen 44 sportshy 33 joldama jeńip alǵan. 1996 jyldan beri jazǵy Paralimpiada oiyndarynda da Qazaqstan quramasy 7 medal ielengen.
