.jpg)
Sýret: QR Úkimeti
Qazaqstan Premer-Ministri Oljas Bektenov Qyzylorda oblysyna jumys sapary barysynda «Báiterek» ǵaryshtyq zymyran keshenine bardy, sondai-aq Baiqońyr qalasynyń damý josparymen tanysty.
Ǵaryshtyq zymyran kesheniniń qurylysy «Soiýz-5» jańa zymyran tasyǵyshtaryn ushyrýǵa arnalǵan «Zenit-M» ǴZK infraqurylymy bazasynda júrgizilip jatyr. 2018 jyly reseilik tarap alańdy jalǵa alýdy toqtatqannan keiin nysandy qazaqstandyq mamandar paidalanýda. Jumystyń aiaqtalý merzimi 2028 jyldyń mamyryna josparlanǵan, al alǵashqy ushý synaqtaryn 2025 jyly bastaý josparlanyp otyr. Keshenniń jylyna 6-8 zymyran ushyrýǵa múmkindigi bar.
Oljas Bektenov montajdaý-synaq keshenin, sondai-aq zymyran kólemine shaqtalǵan kólik qondyrǵylaryn qarap shyqty. «Báiterek» BK» AQ basqarma tóraǵasy Aidyn Aiymbetov keshendi zamanaýi júielerge sáikestendirip jańǵyrtý týraly baiandap, energiia tasymaldaýshy júielerdi tekserý kezeńderi, sondai-aq «Báiterek» jobasy úshin mamandardy oqytý týraly habardar etti.
Úkimet basshysy «Báiterek» ǵaryshtyq zymyran kesheni búginde postkeńestik aýmaqtaǵy Qazaqstan men Reseidiń eń iri birlesken jobasy ekenin jáne eki memleket basshylarynyń erekshe baqylaýynda ekenin atap ótti. Biyl ony iske asyrýǵa 14,7 mlrd teńge baǵyttaldy, qarajattyń qalǵan bóligin bólý máselesi qosymsha pysyqtalatyn bolady. Oljas Bektenov ekologiialyq taza tasymaldaǵyshtarda ǵarysh apparattaryn sátti ushyrý úshin mamandardyń tyǵyz birlesken jumysynyń qajettiligine nazar aýdardy.
«Zymyrandardy ushyrý merzimderin ózgertpeý kerek. Úsh ushyrylymnyń birinshisi kelesi jyly ótýi tiis. Joba “Baiqońyr” kesheniniń belsendi jumysyn qamtamasyz etý úshin asa qajet. Bul oraida birlesken kásiporyndaǵy eńbek ujymynyń jumysy da mańyzdy. Sondai-aq ǵylymi ortamen de ózara tyǵyz is-qimyldy úzbeý kerek», — dep atap ótti Oljas Bektenov.
Qalany damytý jospary týraly Premer-Ministrge QR Prezidentiniń «Baiqońyr» keshenindegi arnaiy ókili Qairat Nurtai baiandady. Qazirgi ýaqytta halyqtyń 70%-yn Qazaqstan azamattary quraidy. Tabiǵi ósim men kóshi-qon aǵyny esebinen oń dinamika tirkelip otyr. Qalanyń qarqyndy ósýin eskere otyryp, áleýmettik, injenerlik infraqurylymdy damytý, turǵyn úi qoryn ulǵaitý jónindegi sharalar iske asyrylýda. Máselen, 600 orynǵa arnalǵan mektep salý josparlanǵan, ótken jyldyń qorytyndysyna sáikes, qazaqstandyq bilim berý standarttary boiynsha 2 balabaqsha ashyldy, bul kezekti eki ese tómendetýge múmkindik berdi.
«Baiqońyr» keshenin gazben jabdyqtaý týraly kelisimge sáikes qalada barlyq kóppáterli turǵyn úiler gazdandyryldy. Budan basqa, sýmen jabdyqtaý jáne sý burý jelileri jalǵa berýden alynyp, oblystyq kommýnaldyq menshikke berildi. «Baiqońyr» kesheniniń obektilerine ruqsat alýdy jeńildetý úshin tsifrlyq quraldardy engizý múmkindigi qarastyrylýda.
