Búgin Tokio Olimpiadasynyń ashylý saltanaty qarsańynda Qazaqstan Ulttyq Olimpiadalyq komiteti olimpiadalyq komanda sportshylaryn qoldaýǵa arnalǵan án men beinebaiannyń tusaýkeserin jasady, dep habarlaidy "Ult aqparat" Olympic.kz-ke silteme jasap.
«Arnaý» ánine arnalǵan beinebaianǵa áigili Roza Rymbaeva, tanymal sazger Renat Gaisin, Ninety One toby, Marsel, Áli Oqapov, Aidana Medenova, Qaraqat Bashanova, DinaIa jáne Mádi Syzdyqov tústi.
Oǵan negiz retinde Renat Gaisin jazǵan Ulttyq Olimpiadalyq komitettiń ánurany alyndy, al mátinniń avtory - Miras Qaldymurat. Ánurannyń qaiyrmasy olimpiadashylarǵa arnaý retinde aitylady. Odan bólek, «Arnaý» ánin jaryqqa shyǵarýǵa Áli Oqapov, Batyrhan Málikov, Daniiar Qulymshin, Azamat Ashmaqyn úles qosty. Al án mátinin Daniiar Ótegen, Dýlat Muhametqaliev jáne Aleksei Maklai jazdy.
Týyndynyń túp maǵynasy árbir atlettiń ómirindegi eń basty qundylyq – olimpiadalyq arman men maqsatqa jeter jolyndaǵy qiyndyqtardy eńserýge negizdeledi.
Ánniń lirikalyq óńdeýin tanymal mýzykanttar daiyndaǵan. Beinebaiannyń rejisseri –qazaqstandyq Ashat Baianov.
Videoklipte ánniń negizi maǵynasy saqtalǵan. Al fonda tanymal qazaqstandyq sportshylardyń jarqyn sátteri beinelenedi. Atap aitar bolsaq, boksshy Vasilii Levittiń jekpe-jegi, Dmitrii Balandinniń finaldaǵy jeńisti sáti, dziýdoshy Eldos Smetovtiń beldesýinen úzindiler, gimnast Milad Karimidiń óner kórsetken sáti, sporttyq quzǵa órmeleýden Rishat Haibýllin men boksshy Nadejda Riabetstiń jattyǵýy, Aleksandr Vinokýrovtyń Olimpiadadaǵy jeńisi men Bekzat Sattarhanovty marapattaý sáti kórinis tapqan.
«Qazaqstandyqtardyń sporttaǵy jetistikteri elimizdiń tarihyna altyn áriptermen jazyldy. Olar shabyttandyrady, qýat beredi jáne myńdaǵan otandastarymyzdyń maqtanyshyna sebep bolady. Olimpiada oiyndarynyń ashylý saltanaty ótetin kúni biz sportshylarymyzǵa biz árdaiym qoldaitynymyzdy, jankúierlerdiń mańyzdy jarysqta máre syzyǵynda daiyn turǵan sportshylardyń árdaiym janynan tabylatynyn jetkizgimiz keledi», - dedi Ulttyq Olimpiadalyq komiteti #teamKZ-tiń «Bir el - bir komanda» ustanymyn eske ala otyryp.
Mýzykalyq týyndy men beinebaian qazaqstandyq sporttyń dańqyn odan ári asyryp, Tokio Olimpiadasynan tys kezderde de qoldanylady. Bul el sportynyń ótkeni men búgini jáne úmitke toly bolashaǵyna qatysty týyndy.
23 shilde kúni 2020 jylǵy Olimpiada oiyndarynyń ashylý saltanaty ótedi. Qazaqstan Ulttyq Olimpiadalyq komiteti jankúierlerdi otandyq sportshylardy eń sońyna deiin qoldaýǵa shaqyrdy.
