Búgin Qazaqstan erler quramasy Qytaidyń Tszianmyn qalasynda Tokio Olimpidasyna irikteý týrnirin bastady, dep habarlaidy "Ult aqparat".
Qazaqstandyq voleibolshylar alǵashqy týrda Qytaimen sheberlik baiqasty. Qarsylas Aziia qurlyǵyndaǵy tájiribeli quramanyń biri sanalady. Qytai quramasy 1984, 2008 jyldary Olimpiada oiyndarynda baq synady. 1978, 1982 jyldarda álem chempionatynda eetinshi oryn aldy. Aziia chempionatynda 1979, 1997, 1999 jyldarda chempion atanǵan.
Búgingi kezdesýde oiyn barysynda qytailyq voleibolshylar basymdyq tanytty. Birinshi sette qazaqstandyq sportshylar olarǵa 19:25 esebimen ese jiberse, odan keiin 14:25, 18:25 esebimen jeńilip qaldy. Osylaisha qazaqstandyq voleibolshylar qarsylasyna jalpy esepte 0:3 esebimen jol berdi.
Esterińizge sala ketelik, Qazaqstan quramasy A tobynda Iran, Qytailyq Taibei, Qytai quramalarymen sheberlik baiqasady. Endi olar 8 qańtarda Iran, 9 qańtarda Qytailyq Taibei quramalarymen oinaidy.
Aziia qurlyǵy boiynsha V tobynda Avstraliia, Ońtústik Koreia, Úndistan jáne Katar voleibolshylary joldamaǵa talasady. Jartylai final men final 11-12 qańtarda ótedi. Jeńimpaz Olimpiadaǵa Aziia qurlyǵynan berilgen jalǵyz joldamaǵa ie bolady.
Aita keterligi, búgingi kúnge deiin Qazaqstan quramasy Olimpiadaǵa birde-bir márte qatysyp kórgen joq. Al álem chempionaty finaldyq kezeńinde 2002, 2006 jyldarda synǵa tústi.
Búgin voleiboldan Qazaqstan qyzdar quramasy Tailandtyń Nakhonratchasima qalasynda Tokio Olimpiadasyna irikteý oiyndaryn jeńispen bastady.
