Bokstan ulttyq qurama bapkerleri Olimpiadadaǵy sátsizdikteri úshin jumystan kete me? Bul suraqqa Sport jáne dene shynyqtyrý isteri komitetiniń tóraǵasy Serik Sápiev jaýap berdi, dep habarlaidy QazAqparat.
«Bizde ár Olimpiada oiyndarynan keiin sport salasyndaǵy keńeitilgen otyrys ótedi. Oǵan Mádeniet jáne sport ministri, Ulttyq Olimpiada komiteti men federatsiialardyń ókilderi qatysady. Onda jibergen qatelikterimizge taldaý júrgizilip, qorytyndy jasalady. Tiisinshe sheshimder qabyldanady. Osy Olimpiada bitken soń da keńeitilgen otyrys uiymdastyrylady, onda bas bapkerler men jetekshilerge qatysty mańyzdy sheshimder qabyldanady. Ázirge osyndai qadamdar ǵana bar. Qurylymdyq ózgerister týraly Olimpiada oiyndary bitken soń ǵana aita alamyz», - dedi Serik Sápiev Ortalyq kommýnikatsiialar qyzmetinde ótken brifingte.
