Qazaqstan boks federatsiiasynyń atqarýshy direktory Myqtybek Maratbek Ortalyq kommýnikatsiialar qyzmetinde qazaqstandyq boksshylardyń Olimpiadadaǵy sátsizdigine ne áser etkenin aitty, dep habarlaidy QazAqparat.
«Ózderińiz bilesizder, olimpiadalyq jarystardy boksshylarymyz sátsiz bastady. Olardyń daiyndalýy úshin Sport ministrligi men Ulttyq Olimpiada komiteti tarapynan materialdyq jaǵynan, jabdyq jaǵynan bári jasaldy. Ókinishke qarai, pandemiia óz áserin tigizýde. Sportshylar úide oqshaýlaýda otyrdy, jabyq bazalarda daiyndaldy. Shetelderge shyqqanda jarysqa deiin 4-5 kún karantinde otyrǵan kezderi boldy. Bul áserin tigizbei qoimady dep oilaimyn. Sondyqtan, olardy synai berýge de bolmaidy. Áli de bolsa, ekinshi top sportshylarymyz oiyn kórsetedi, solardan jaqsy nátijeler kútemiz», - dedi Marat Myqtybek Ortalyq kommýnikatsiialar qyzmetinde ótken brifingte.
Aita keteiik, Tokiodaǵy Olimpiadada Qazaqstan quramasynda sporttyń 28 túrinen 97 joldama bolǵan edi. Ázirge Qazaqstan qorjynynda úsh «qola» medal bar. Olardy dziýdoshy Eldos Smetov jáne aýyr atletter Igor Son men Zúlfiia Chinshanlo jeńip aldy.
