Áigili Rio Olimpiadasynyń chempiondary Dmitrii Balandin men Nidjat Rahimov Qazaqstan Respýblikasynyń Ulttyq ulany «Ońtústik» óńirlik qolbasshylyǵy sport komandasynyń quramyna shaqyryldy.
Eki júz metr qashyqtyqqa júzýden olimpiadanyń altyn júldegeri Dmitrii Balandin men ziltemirdi julqi kóterýden ózine 70 keli salmaqta qarsylastaryn shaq keltirmegen ziltemirshi Nidjat Rahimov aldaǵy ýaqytta Ulttyq ulannyń «Ońtústik» óńirlik qolbasshylyǵyna qarasty 5571 áskeri bólimi atynan «Dinamo» dene shynyqtyrý jáne sport qoǵamynyń qatarynda óner kórsetetin bolady.
Atalmysh oqiǵa búgin jas shaqyrylym jaýyngerlerin Ulttyq ulan qataryna áskerge saltanatty túrde shyǵaryp salý kezinde boldy. Almaty qalalyq Qorǵanys isteri jónindegi departamentiniń qalalyq jinaqtaý pýnktiniń alańynda alǵash ret sap túzegen júzge jýyq kúzgi shaqyrylym jaýyngerleri qatarlaryna ózderimen birge iyq tiresken olimpiadanyń qos tarlanyn kórgende erekshe sezimge bólendi.
Saltanatty is-sharaǵa Ulttyq ulan ardagerleri otstavkadaǵy general-maior Ivan Komarov, otstavkadaǵy polkovnik Gennadii Faleev jáne «Ońtústik» óńirlik qolbasshylyǵy tárbie jáne áleýmettik-quqyqtyq jumystar basqarmasynyń bastyǵy polkovnik Niiaztai Álkeshev qatysyp, Otan aldyndaǵy boryshyn óteýge attanǵaly turǵan jaýyngerlerdiń aldaǵy áskeri qyzmetterine sáttilik tilep, áskeri anttaryna adal bolýǵa shaqyrdy.
Áskerilerdiń jalyndy sózderinen keiin jaýyngerlerdiń arasynan saptyq adymmen shyqqan Dmitrii Balandin men Nidjat Rahimov minberge kóterilip, jas sarbazdarǵa igi tilekterin bildirip, aq jol tiledi. Óz sózinde Dmitrii Balandin: «Qurmetti jas sarbazdar, el qorǵaý qashan da abyroily is bolǵan. Sizderge Otanymyz úlken jaýapkershilikter artýda. Ózderińe mindettelgen tapsyrmalar men buiryqtardy minsiz oryndap, áskeri anttaryńa adal bolyńdar. Áskeri qyzmettiń qiyndyqtaryna moiymai tabandylyqpen tótep beretinderińe men, olimpiada chempiony Dmitrii Balandin kámil senemin!» – dep aǵynan jaryldy.
Is-shara 5571 áskeri bólimi orkestriniń súiemeldeýimen kontserttik baǵdarlamaǵa ulasyp, artynsha jas sarbazdar Otan aldyndaǵy Konstitýtsiialyq boryshyn óteý úshin temirjol vokzalyna jol tartty.
Atap ótkimiz keletini, búgin attanǵan jas sarbazdar Astana qalasynda ótetin saiasi, sporttyq-buqaralyq kólemdi is-sharalar kezinde, onyń ishinde aldaǵy ýaqytta ótetin «EKSPO-2017» Halyqaralyq kórmesinde qoǵamdyq tártip pen qaýipsizdikti qamtamasyz etetin bolady.
Bundai kezdesýlerdiń basty maqsaty áskerge shaqyrýshylardyń júrekterinde Otan qorǵaýǵa degen patriottyq sezimderin oiatyp, Otan aldyndaǵy boryshyn adal ótkerip kelýge jigerlendirý bolyp tabyldy.
"Ult aqparat"
