Grek-rim kúresinen Qazaqstan quramasynyń bas bapkeri Baqtiiar Baiseiitov Tokio Olimpiadasynda Nursultan Tursynovtyń alǵashqy beldesýde jeńilip qalǵanyna pikir bildirdi, dep habarlaidy "Ult aqparat".
«Olimpiada oiyndary ótip jatyr. Ókinishke orai, bizdiń sport túri úshin bári aiaqtaldy. Búgin Nursultan Tursynov nemis balýanymen kúreske shyqty. Ol – Olimpiada oiyndarynyń júldegeri. Jekpe-jekte bizdiń sportshymyzdy birinshi qoidy. Ekinshi úziliste nemis sportshysyn qoidy. Nursultan aila-tásil jasady. Biraq, bul ádis baǵalanbady. Men shaǵym túsirdim, ony qarady. Nátijesinde bul eki upai bizge berilmedi, áitse de bul barlyq jaǵynan tolyq kóterilý boldy. Osy eki upaidy bergende Nursultan jeńiske jeter edi», - dep túsindirdi bas bapker Ortalyq kommýnikatsiialar qyzmetindegi onlain brifingide.
Óz kezeginde QR Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev qazaqstandyqtardan sportshylardy barynsha qoldaýdy surady. Óitkeni Olimpida áli aiaqtalǵan joq.
«Qandai da bir sport túri boiynsha maman bolyp, qorytyndy shyǵarýdyń qajeti joq. Barlyq qazaqstandyqtardan áli shyǵatyn sportshylarǵa barynsha qoldaý kórsetýdi suraimyn. Jeńilgen kezde qalai qiyn bolaryn óz tájiribemnen bilemin. Barlyǵynan sportshylardy qoldaýdy suraimyn. Biz áli de kúresetin bolamyz», - dedi Serik Sápiev.
Eske sala ketsek, búgin 87 keli salmaq dárejesindegi qazaqstandyq balýan Nursultan Tursynov kilemge shyqty. Onyń alǵashqy qarsylasy germaniialyq Denis Kýdla boldy. Ekeýara kezdesý 4:1 esebimen nemis sportshysynyń enshisine sheshildi.
