Tennisten Qazaqstannyń birinshi raketkasy, Tokio Olimpiadasynyń qatysýshysy Elena Rybakinaǵa yntalandyrý syiaqysy beriledi, dep habarlaidy "Ult aqparat".
«Árine, yntalandyrý bolady. Qazirdiń ózinde kelissózder júrip jatyr. Atap aitqanda, Beeline, Forte Bank kompaniialary sekildi demeýshiler qyzyǵýshylyq tanytýda. Kelissóz júrip jatyr. Shamamen 70 myń AQSh dollary kóleminde syiaqy taǵaiyndap, sportshynyń odan ári jarystarǵa qatysýyna qoldaý bildirgeli jatyr», - dedi QR Tennis federatsiiasynyń vitse-prezidenti Iýrii Polskii Ortalyq kommýnikatsiialar qyzmetinde ótken baspasóz máslihatynda.
Sondai-aq, spiker tennisshimen qatar, onyń jattyqtyrýshysymen de qosymsha jumystyń qolǵa alynatynyn aitty.
«Elena - jas tennisshi jáne onyń bolashaǵy zor. Biz sportshynyń odan ári dami túsýi jolynda qolda bar qoldaýdy kórsetemiz. Onyń ústine Tokio - tennisshiniń alǵashqy Olimpiadasy. Jalpy, shynyqqan, júlde alatyn daiyn sportshy deýge bolady. Tokio Olimpiadasy onyń ózine degen senimin arttyra tústi. Alda ony AQSh-ta ótetin tennis týrniri kútip tur. Elenany qoldaimyz jáne oǵan úlken senim artamyz», - deidi ol.
Aita ketsek, Elena Rybakina Tokio Olimpiadasynyń jartylai finalda ýkrainalyq tennisshi Elena Svitolinaǵa ese jiberip aldy.
