Búgin Májilistiń jalpy otyrysynda Memleket basshysy Úkimet aldyndaǵy basty mindetterdi kórsetip berdi. Jańa taǵaiyndalǵan Úkimet basshysy men onyń múshelerin qandai ister kútip tur? Osy jáne ózge de saiasi jaittar jaiynda qazaqstandyq saiasattanýshy Rasýl Jumaly pikir bildirdi, dep habarlaidy QazAqparat.
«Búgingi kúnniń basty jańalyǵy - Memleket basshysy aldaǵy basty mindetterdi jiktep berdi jáne Úkimet basshysy taǵaiyndaldy. Endi Úkimettiń jańa quramy jasaqtalady. Búgingi jiynnan uqqanym, Qazaqstanǵa jańarý kerek. Jurttyń da kútip otyrǵany sol. Prezident barlyq sala boiynsha artyq-kem tusyn aityp, túitkildi máselelerdi sheshýdi tapsyryp otyr. Jańa Úkimettiń Memleket basshysynyń tapsyrmasyn qalai júzege asyratynyn ýaqyt kórsetedi. Qasym-Jomart Toqaev ashyǵyn aitty, oligarhiialyq toptyń paida bolýy ádil básekelestiktiń jolyn kesip otyr, kóleńkeli ekonomika qymbatshylyqqa ákeldi. Oǵan dálel - Aqtaý halqynyń suiytylǵan gaz baǵasyna qatysty talaby. Nátijesinde baǵanyń negizsiz, qoldan jasalǵany belgili boldy. Beibit talaptyń arty jappai tártipsizdikke alyp keldi», - dedi Rasýl Jumaly.
Onyń aitýynsha, eldegi jaǵdaidyń ýshyǵýyna sybailas jemqorlyq pen monopoliia zańdarynyń saqtalmaýy da sebep.
«Búgin aitylǵan eldegi máseleler buǵan deiin de qozǵalyp júr. Biraq, sony sheshýshilerdiń kúsh-jigeri bolmaǵan sekildi. Endi Prezident iske qol túre kirisip, jigerli bolýdy ózinen bastap otyr. Memleket basshysynyń sózden iske kóshý kerektigin basa aitqany kóńilge úmit uialatady. Sondai-aq, Qasym-Jomart Toqaev biraz jait pen keibir quzyrly organdardyń qyzmetin synady. Rasynda, bylai alyp qarasaq, beibit sherýdiń arty jappai tártipsizdikke ainaldy. Lańkestik árekettiń bolǵanyn Prezidenttiń ózi aitty, sonda lańkestik áreketke jol berip, ulttyq qaýipsizdik komiteti, basqa da quzyrly organdar qaida qarap otyrdy? Tártip saqshylary sodyrlarmen kúresti, olar qaidan keldi? Shekara qyzmeti qaida qarap otyr? Suraq kóp. Endigi maqsat – osydan sabaq alyp, onyń qaita bolýyna jol bermeý», - deidi ol.
